БМТ бош котиби Антониу Гутерриш денгиз сатҳининг тез кўтарилиши оқибатида айрим давлатлар сув остида қолиши ҳақида гапирди. Бу ҳақда ташкилот сайтида хабар берилди.
Гутерриш 14 февраль куни БМТ Хавфсизлик Кенгашига қилган мурожаатида бу ҳақда гапирди. У ХХ асрда глобал денгиз сатҳи сўнгги 3 000 йилда бошқа асрларга қараганда тезроқ кўтарилганини таъкидлади. Сиёсатчи Бангладеш, Хитой, Ҳиндистон ва Нидерландия каби давлатлар хавф остида қолишини айтди. Лагос, Мапуту, Бангкок, Дакка, Жакарта, Мумбай, Шанхай, Копенгаген, Лондон, Лос-Анжелес, Нью-Йорк, Буэнос-Айрес ва Сантяго каби метрополитан ҳудудлар оғир оқибатларга дуч келишини таъкидлади.
“Фиджи, Вануату ва Соломон ороллари каби баъзи мамлакатларда денгиз сатҳининг кўтарилиши аллақачон одамларнинг оммавий кўчишига олиб келган. Шимолий Африкада шўр сув тупроққа сингиб, чучук сув билан аралашиб, экинларни нобуд қилади”, — дейди БМТ бош котиби
Муаммони ҳал қилиш учун БМТ раҳбари учта йўналишда ишлашни таклиф қилди:
- иқлим ўзгаришига қарши курашни давом эттириш ва биринчи навбатда, карбонат ангидрид чиқиндиларини камайтириш;
- қашшоқлик, тенгсизлик, дискриминация, инсон ҳуқуқларининг бузилиши каби ижтимоий беқарорлик муаммоларини ҳал қилиш;
- денгиз сатҳининг кўтарилишидан жабрланган одамларнинг ҳуқуқларини ҳимоя қилиш учун мавжуд механизмлардан фойдаланиш ва янгиларини яратиш.
Изоҳ (0)