“Roma” futbolchisi jamoani sudga bermoqchi
Nikolo Zaniolo “Roma”ni sudga berishi mumkin.
Roma Press nashrining xabar berishicha, futbolchi va uning atrofidagilar Zanioloning mavsum oxiriga qadar tarkibdan chetlatilgani bo‘yicha sudga murojaat qilmoqchi. Bunga sabab klub uning transferini amalga oshirish uchun “tazyiq va bosim o‘tkazgan“.
Kutilganidek, Nikolo “Roma”ning ruxsatisiz bir kunlik mashg‘ulotlarni o‘tkazib yuborgan bo‘lsa-da, individual mashqlarni davom ettiradi.
Eslatib o‘tamiz, yanvardagi transfer oynasida Zaniolo “Roma”dan o‘zini transferga qo‘yishni so‘ragan edi. Biroq futbolchiga faqatgina “Bornmut” klubi qiziqish bildirdi. Ushbu taklifni qabul qilgan “Roma” yarim himoyachiga ultimatum qo‘ydi — yo u ingliz klubiga o‘tishga rozi bo‘lishi kerak yoki 2024-yilning yoziga qadar (shartnomasi yakunigacha) tarkibdan chetlatilishi kerak.
Nikolo APL klubiga o‘tishga rozi bo‘lmadi va “Roma” uni chetlatdi. 30-yanvar kuni futbolchi “Bornmut”ga o‘tishga rozi bo‘lganda esa angliyaliklar qishda ko‘p xarajatlar qilgani uchun uni xarid qilishdan voz kechdi.
