“Manchester Siti” Angliya Premyer Ligasining 23-turida “Aston Villa”ni mag‘lubiyatga uchratdi (3:1).
Bu “shaharliklar” ustozi Xosep Gvardiola uchun liga doirasidagi 250-o‘yin bo‘ldi. 52 yoshli mutaxassis qo‘l ostidagi jamoa APL doirasidagi dastlabki 250 ta o‘yinda 184 ta g‘alaba qayd etdi (32 durang, 34 mag‘lubiyat). Bu musobaqa tarixidagi eng yaxshi natija.
Bu borada Pep “Liverpul” ustozi Yurgen Kloppning rekordini yangiladi. Nemis murabbiyi boshqaruvi ostidagi “qizillar” APLdagi 250 o‘yinda 160 ta g‘alaba qayd etgan.
“Chelsi”, “Manchester Yunayted” va “Tottenhem” jamoalari sobiq ustozi Joze Mourinyo hisobida 158 ta g‘alaba bor. “Arsenal” sobiq murabbiyi Arsen Vengerda bu ko‘rsatkich 146 ga teng. Rafael Benites (“Liverpul”, “Chelsi”, “Nyukasl”, “Everton”) esa 138 ta g‘alabaga erishgan.
Gvardiola g‘alabalar foiz ko‘rsatkichi bo‘yicha (73,6%) APLning ayni vaqtdagi murabbiylari orasida eng yaxshi natija qayd etyapti.
Gvardiola hozirda “Aston Villa”ni boshqarayotgan Unai Emeri bilan 14-marta to‘qnash keldi. Ilk bor ular 2008-yilda o‘zaro ro‘baro kelgandi (“Barselona” va “Valensiya” boshqaruvi ostida). Bu o‘yinlarning hech birida Gvardiola vatandoshiga yutqazmagan.
“Manchester Siti” o‘z maydonida ketma-ket beshta o‘yindan beri g‘alabali seriya qayd etmoqda. Bundan avval jamoa “Etihad”da “Arsenal” (1:0), “Vulverhempton” (3:0), “Tottenhem” (4:2) va “Chelsi”dan (4:0) ustun kelgandi.
O‘z uyidagi so‘nggi 8 o‘yinda “Manchester Siti” 7 ta g‘alaba va bitta durang qayd etdi. Manchester jamoasi keyingi to‘rtta o‘yinini safarda o‘tkazadi. 4-mart kuni esa o‘zida “Nyukasl”ni qabul qiladi.
Izoh (0)