“Real”ning yubiley sovrini, Kroosning rekordi, Gvardiolaga yetib olgan Anchelotti va madridliklar qo‘lga kiritgan boshqa rekordlar

Madridning “Real” jamoasi klublar o‘rtasidagi Jahon chempionati finalida “Al-Hilol”ni mag‘lub etib (5:3), sovringa ega chiqdi.

Bu “qaymoqranglilar” uchun ushbu musobaqadagi 5-sovrin bo‘ldi. Bundan oldin ispan jamoasi 2014, 2016, 2017 va 2018-yillarda klublar o‘rtasida jahon chempioniga aylangandi. Bu musobaqada rekord natija hisoblanadi. “Barselona” hisobida uchta sovrin bo‘lsa, “Bavariya” va “Korintians” ikki martadan g‘oliblikni qo‘lga kiritgan.

Shu tariqa klublar o‘rtasidagi JCHda qatorasiga 10-marta Yevropa klubi sovringa ega chiqmoqda. UEFA vakillari jami 15 marta musobaqa g‘olibiga aylangan. Yana to‘rtta sovrin Janubiy Amerika mintaqasi vakillariga nasib etgan, boshqa mintaqa vakillari g‘olib bo‘lolmagan.

Umumiy miqdorda “Real” o‘z tarixidagi 100-sovrinni qo‘lga kiritdi. “Barselona” hisobida 98 ta sovrin bor. Biroq ayrim manbalar “Real” 99-sovrinini qo‘lga kiritganini aytmoqda.

“Real” ustozi Karlo Anchelotti murabbiylik faoliyatidagi 25-sovringa ega chiqdi. Bu sovrinlarning 9 tasini italiyalik mutaxassis Madrid jamoasi boshqaruvida qo‘lga kiritgan. Yana 8 ta titul “Milan” bilan qo‘lga kiritilgan bo‘lsa, “Chelsi” va “Bavariya” bilan uchtadan, “Yuventus” hamda “PSJ” boshqaruvida esa bittadan sovringa ega chiqqan.

Shuningdek, Anchelotti uchinchi marta klublar o‘rtasidagi Jahon chempionatida g‘olib bo‘ldi va bu borada Pep Gvardiola bilan tenglashib oldi.

Madridliklar yarim himoyachisi Toni Kroos klublar o‘rtasidagi Jahon chempionati sovrinini yutish bo‘yicha mutlaq rekordchi bo‘lib turibdi. Germaniyalik futbolchi jami olti bor —  2018, 2017, 2016, 2014 va 2022-yillar “Real” bilan, 2013-yilda esa “Bavariya” safida ushbu sovringa ega chiqqan.

“Real” hujumchisi Karim Benzema klub safidagi sovrinlari sonini 24 taga yetkazib oldi. Faqat Marselo (25) “Real”da titullar bo‘yicha undan oldinda. Shuningdek, Benzema umumiy miqdorda 32 ta titul bilan Fransiya futboli tarixidagi eng sovrindor o‘yinchiga aylandi.

“Real”ning eng sovrindor futbolchilari:

• • Marselo (25)
  • Karim Benzema (24)
  • Pako Xento (23)
  • Serxio Ramos (22)
  • Manuel Sanchis (22)
  • Luka Modrich (22)
  • Nacho (22)
  • Dani Karvaxal (21)

“Qirollik klubi” prezidenti Florentino Peres “Real” boshqaruvidagi 31-sovriniga ega chiqdi. Bu borada Santyago Bernabeuning rekordiga qadar bitta sovrin qoldi.