Туркиянинг Қаҳраманмараш вилоятида даҳшатли зилзилалардан 96 соат ўтиб, вайроналар остидан суриялик ёш қиз қутқариб олинди, деб хабар бермоқда Anadolu.
Миллий тиббий қутқарув гуруҳи ходимлари, полиция ва маҳаллий маъмурият уч қаватли бино вайроналарини қазишда иштирок этган. 14 соатлик саъй-ҳаракатлардан сўнг, Сурияда туғилган 26 ёшли Фатма Каруш бетон блоклар остидан чиқариб олинди. Жабрланувчи касалхонага ётқизилди.
6 февраль, душанба куни Туркиянинг жануби-шарқида магнитудаси етти баллдан ортиқ бўлган иккита зилзила (Тошкент вақти билан 06:17 да – 7,7 балл ва 15:24 да – 7,6 балл) содир бўлди.
Зилзила қўшни Сурияга ҳам қаттиқ таъсир қилди. Икки мамлакатда табиий офат қурбонлари сони бугунгача 21 минг кишидан ошди.
Туркия президенти Ражаб Тоййиб Эрдўғон мамлакатда табиий офат қурбонлари хотирасига етти кунлик миллий мотам эълон қилди. Туркия давлат байроқлари бутун мамлакат бўйлаб ярим туширилган ҳолатда бўлади.
Вайронкор зилзила бошқа қўшни мамлакатларда, жумладан, Ливан, Шимолий Кипр Турк республикаси, Греция Кипри ва Ироқда ҳам сезилди.
Изоҳ (0)