O‘zbekistonda tayyor mebel mahsulotlarini eksport qiluvchi tadbirkorlarni qoʻllab-quvvatlash uchun prezident qarori bilan qator choralar belgilandi.
“Mebel mahsulotlari ishlab chiqarish va eksport qilishni ragʻbatlantirishga oid qoʻshimcha chora-tadbirlar toʻgʻrisida”gi qarorga ko‘ra, 2024-yil 1-yanvargacha tayyor mebel mahsulotlarini eksport qiluvchi tadbirkorlarga xorijdagi ofis, savdo va ombor binolarini ijaraga olish xarajatlarining bir qismini qoplab berishda mazkur noturar joylar maydoniga qoʻyilgan meʼyor 100 kvadrat metrdan 250 kvadrat metrga oshiriladi.
Yillik tushumida tayyor mebel mahsulotlari eksportidan tushum ulushi kamida 30 foizni tashkil qiladigan mahalliy korxonalar tomonidan injener-texnolog, lak va boʻyoq sepish ustasi, dizayner kabi xorijiy mutaxassislar jalb qilinganda, ular ish haqining 25 foizi, biroq mehnatga haq toʻlashning eng kam miqdorining 9 barobaridan koʻp boʻlmagan qismi qoplab beriladi.
Shuningdek, mebel ishlab chiqarishda foydalaniladigan xomashyo, ehtiyot qismlar, furnitura va aksessuarlarni Oʻzbekistonga olib kirishda bojxona bojining nol stavkasi qoʻllanilishi 2024-yil 1-yanvargacha uzaytirildi.
Izoh (0)