Qashqadaryo viloyati hokimligi hamda hududdagi mavjud tuman va shahar hokimliklarida hokimiyat xodimlari uchun bepul tibbiy ko‘riklar boshlandi. Bu haqda “Daryo”ga viloyat hokimligi axborot xizmati rahbari Ahror Sodiqov xabar berdi.
“Davlat xizmatchilarining salomatligi samarali faoliyati uchun asosdir. Shu maqsadda, Prezident huzuridagi Davlat xizmatini rivojlantirish agentligi tashabbusi, Sog‘liqni saqlash vazirligi, Qoraqalpog‘iston Respublikasi Vazirlar Kengashi, viloyatlar hamda Toshkent shahar hokimligi hamkorligida davlat xizmatchilari birlamchi tibbiy ko‘rikdan o‘tkazilmoqda.
Bugun Qashqadaryo viloyati hokimligi jamoasi, tuman va shahar hokimliklari vakillari tibbiy ko‘rikdan o‘tkazilib, ularga salomatligi to‘g‘risidagi xulosalar, baʼzi holatlarda esa chuqurlashtirilgan ko‘rik uchun yo‘llanmalar berilmoqda. Muhimi, davlat xizmatida ishlayotgan va ko‘p hollarda o‘z salomatligi uchun vaqt topa olmayotgan xizmatchilar ushbu imkoniyatdan mamnun bo‘lishmoqda”, — deydi hokimlik masʼuli Ahror Sodiqov.
“Davlat fuqarolik xizmati to‘g‘risida”gi qonunda davlat fuqarolik xizmatchisiga tibbiy xizmat ko‘rsatish ijtimoiy himoya chorasi sifatida kafolatlangan.
“Bu kabi tibbiy ko‘riklari viloyatimizning barcha tuman va shahar hokimliklarida ham reja asosida 20-fevralga qadar davom etadi”, — deydi viloyat hokimligi axborot xizmati rahbari.
Izoh (0)