Қашқадарё вилояти ҳокимлиги ҳамда ҳудуддаги мавжуд туман ва шаҳар ҳокимликларида ҳокимият ходимлари учун бепул тиббий кўриклар бошланди. Бу ҳақда “Дарё”га вилоят ҳокимлиги ахборот хизмати раҳбари Аҳрор Содиқов хабар берди.
“Давлат хизматчиларининг саломатлиги самарали фаолияти учун асосдир. Шу мақсадда, Президент ҳузуридаги Давлат хизматини ривожлантириш агентлиги ташаббуси, Соғлиқни сақлаш вазирлиги, Қорақалпоғистон Республикаси Вазирлар Кенгаши, вилоятлар ҳамда Тошкент шаҳар ҳокимлиги ҳамкорлигида давлат хизматчилари бирламчи тиббий кўрикдан ўтказилмоқда.
Бугун Қашқадарё вилояти ҳокимлиги жамоаси, туман ва шаҳар ҳокимликлари вакиллари тиббий кўрикдан ўтказилиб, уларга саломатлиги тўғрисидаги хулосалар, баъзи ҳолатларда эса чуқурлаштирилган кўрик учун йўлланмалар берилмоқда. Муҳими, давлат хизматида ишлаётган ва кўп ҳолларда ўз саломатлиги учун вақт топа олмаётган хизматчилар ушбу имкониятдан мамнун бўлишмоқда”, — дейди ҳокимлик масъули Аҳрор Содиқов.
“Давлат фуқаролик хизмати тўғрисида”ги қонунда давлат фуқаролик хизматчисига тиббий хизмат кўрсатиш ижтимоий ҳимоя чораси сифатида кафолатланган.
“Бу каби тиббий кўриклари вилоятимизнинг барча туман ва шаҳар ҳокимликларида ҳам режа асосида 20 февралга қадар давом этади”, — дейди вилоят ҳокимлиги ахборот хизмати раҳбари.
Изоҳ (0)