O‘zbekistonda so‘nggi uch haftada apelsin narxi 33 foizga oshdi

Joriy yilning yanvar oyida O‘zbekistonda apelsinning ulgurji narxlari dinamikasida o‘sish tendensiyasi kuzatilmoqda. Bu haqda EastFruit xabar bermoqda. 

Mazkur holat o‘tgan yillarning shu davriga nisbatan mutlaqo teskaridir. 

2023-yilning 6-yanvaridan 27-yanvariga qadar O‘zbekistonda apelsinning o‘rtacha ulgurji narxi 1 kg uchun 12 mingdan 16 ming so‘mgacha, ya’ni oxirgi uch haftada 33 foizga oshgan. 

Taqqoslash uchun, o‘tgan yilning shu davrida ushbu mahsulotning o‘rtacha ulgurji narxi 13 foizga, 2021-yilda esa 10 foizga pasaygan edi.

Apelsin narxlari 2023-yil yanvar oyida o‘tgan yillarga nisbatan butunlay qarama-qarshi tendensiyaga ega. 

Shu bilan birga, 2023-yilning 27-yanvar holatiga ko‘ra, O‘zbekistonda apelsinning o‘rtacha ulgurji narxi o‘tgan yilning shu sanasiga nisbatan 14 foizga yuqori, lekin 2021-yilning shu sanasiga nisbatan 11 foizga past.

Mamlakatda 2022-yili avgust oyining o‘rtalaridan dekabr oyi oxiriga qadar apelsinning o‘rtacha ulgurji narxlari (2022-yil noyabr oyining ikkinchi yarmi va dekabrning birinchi o‘n kunligini hisobga olmaganda), o‘tgan yillarning shu davridagi darajadan sezilarli past bo‘lgan.