Bugun, 23-yanvar kuni butun Pokiston elektr tokisiz qoldi, bunga tizimning ishdan chiqishi sabab bo‘ldi. Bu haqda mamlakat Energetika vazirligi o‘z Twitter’ida ma’lum qildi.
“Dastlabki ma’lumotlarga ko‘ra, bugun ertalab 7:34 da Milliy tarmoq tizim chastotasi pasaygan, natijada energiya tizimida katta ko‘lamli ishdan chiqish yuz bergan”, — deyiladi xabarda.
Hukumat allaqachon elektr ta’minotini qayta tiklash ishlarini boshlab yuborgan, Islomobod va Peshovar elektr ta’minoti kompaniyalarining bir qancha elektr tarmoq stansiyalari faoliyati qayta tiklandi.
Pokistonda yonilg‘ini tejash va xarajatlarni kamaytirish maqsadida qish mavsumida energobloklar tungi vaqtda o‘chirib qo‘yiladi, dedi energetika vaziri Xurrum Dastagir. Uning aniqlik kiritishicha, bugun ertalab ular qayta yoqilganida mamlakat janubida, Jamshoro va Dadu shaharlari oralig‘ida chastotalar o‘zgarishi qayd etilgan.
“Shu sababli kuchlanish tebranishi yuz berdi va tizimlar birin-ketin o‘chib qoldi. Bu jiddiy inqiroz emas”, — deya xulosa qildi Dastagir.
Pokistonda xuddi shunday katta ko‘lamli chiroq o‘chishi 2021-yil 9-yanvardan 10-yanvarga o‘tar kechasi ham sodir bo‘lgandi, o‘shanda Islomobod, Karachi, Ravalpindi, Lahor va Mo‘lton elektr tokisiz qolgandi. Eelektr energiyasi 9-yanvar kuni tunda, taxminlarga ko‘ra, energiyani taqsimlash tizimidagi nosozliklar tufayli o‘chib qolgan.
Izoh (0)