Ангрен прокурорининг муҳокамаларга сабаб бўлган видеоси: аслида нима бўлган эди? (видео)

Telegram’даги каналларда Ангрен шаҳри прокурори Улуғбек Ҳабилжоновнинг шаҳардаги 22-мактабдан туриб, масъулларга видеомурожаат қилгани, унда мактаб ҳудуди қордан тозаланмагани, ўқитувчилари эса ишга келмай маош олаётгани айтилганди.

Мазкур видео қисқа фурсатда ижтимоий тармоқ фойдаланувчиларининг кескин эътирозига сабаб бўлди. Ва кўпчилик прокурорни ўқитувчиларни мажбурий меҳнатга даъват қилмоқда, деган фикрларни билдирди.

Воқеага эътибор қаратган мактабгача ва мактаб таълими вазири Ҳилола Умарова вазият юзасидан Бош прокуратура раҳбарияти билан гаплашганини, ҳолат айни дамда назоратга олинганини ёзди.

Президентимизнинг тегишли қарорларига асосан педагог ходимларини хизмат мажбурияти билан боғлиқ бўлмаган ишларга жалб қилиш қатъиян тақиқланганини эслатиб ўтаман. Ўқитувчи қадрланмаган юрт ҳеч қачон тараққий этмайди. Шу боис барчадан жумладан мутасадди раҳбарларимиздан бугун давлатимиз раҳбари томонидан олиб борилаётган ўқитувчиларни улуғлаш ва жамиятда энг обрўли инсон қилиш давлат сиёсатини қўллаб-қувватлаб, бу борада энг аввало ўзимиз ўрнак кўрсатишимизни сўраб қоламан, — деди вазир.

2022 йилнинг декабрь ойида ўқитувчиларни мажбурий меҳнатга жалб қилмаслик хусусида гапириб, масъуллар мурожаат қилган Президент администрацияси ижро этувчи аппаратининг коммуникациялар ва ахборот сиёсати бўйича шўъба мудири Саида Мирзиёева «Энди бу ишларни тўхтатиш вақти келди. Чунки ўқитувчилар қадрини кўтармас эканмиз, ҳеч нарсага эриша олмаймиз. Ўқитувчиларга вазифасидан ташқари ишларни юклайдиганларни маъмурий ва жиноий жавобгарликка тортиш бўйича қонун лойиҳаси ишлаб чиқилди ва тез орада қабул қилиниши кутиляпти», — деганди.

Саида Мирзиёева ўшанда ўзбекистонликларнинг фарзандига таълим бераётган ўқитувчилар йиллар давомида ҳақ-ҳуқуқсиз, ҳимоясиз, қадрсиз бўлганини қўшимча қилганди.

Ўқитувчилардан йиллар давомида фаррош, комиссияга хизмат кўрсатувчи официант, бўш залларни тўлдирувчи «массовка» сифатида фойдаланилди. Афсуски, фарзандларимизга таълим бераётган ўқитувчилар йиллар давомида ҳақ-ҳуқуқсиз, ҳимоясиз, қадрсиз бўлди. Улардан боғбон, фаррош, мактабга келган комиссияларга хизмат кўрсатувчи официант, зерикарли тадбирларда бўш залларни тўлдирувчи «массовка», матбуот нашрларига мажбурий обуначи, тунги навбатчи ва мактаб қоровули сифатида фойдаланилди, — деганди Саида Мирзиёева.

Кўп ўтмай Ангрен шаҳри прокурори айтган гаплари учун узр сўраб чиқди. Ва ўқитувчи-мураббийларга нисбатан ҳурмати чексиз эканини қўшимча қилди.

Сўзим аввалида ўқитувчи ва мураббийларга чуқур ҳурмат сақлаган ҳолда улардан узр сўраб қоламан. Хабарингиз бор, кеча ижтимоий тармоқларда менинг Ангрен шаҳридаги 22-сонли умумтаълим мактаб ҳудуди қордан тозаланмаганлиги бўйича қилган видеохабарим тарқалиб, кенг муҳокамаларга сабаб бўлмоқда. Жорий йилнинг 18 январь куни шаҳар ҳудудидаги мактабларнинг ўқув йилига тайёргарлик ҳолатини ўрганиш мақсадида шаҳарда 4 та сектор раҳбари билан мактабларда ўрганиш олиб бордик. 22-сон умумтаълим мактаб ҳудудида бўлган вақтимизда мактаб ҳудуди қорлардан тозаланмаганлиги ва ўқув жараёнида ўқитувчи ва ўқувчиларнинг соғлиғига хавф туғдиришини инобатга олиб, Telegram ижтимоий тармоғида маъмуриятга мактабда тозалаш ишларига масъул ишчилар ҳам ишни бажармаганлигини билдириб, буни бартараф қилиш лозимлигини айтганман.

Аслида мен мактаб ҳудудини ўқитувчи мураббийларимиз эмас, балки ушбу ишга масъул шахслар (фаррош ваҳоказо) бажаришини ташкиллаштиришни сўраганман. Мен, ушбу ҳолатдан қаттиқ афсусдалигимни билдириб, бизга таълим бериб келаётган ёш авлодни тарбиялашда жонбозлик кўрсатаётган барча ўқитувчи ва мураббийлардан узр сўраб қоламан, — деди такрорий видеомурожаат қилиб чиққан прокурор.

Ангрен шаҳар ҳокимлиги ахборот хизмати раҳбари Гулшода Шаҳанованинг «Дарё»га билдиришича, прокурорнинг мактаб ҳудуди қордан тозаланмагани айтилган видеохабар шаҳар масъуллари учун ташкил қилинган «Ангрен жараён» гуруҳига юборилган.

Бу гуруҳга шаҳар ҳокими, прокурор ва ИИБ раҳбарларидан тортиб, маҳалладаги хотин-қизлар фаолларигача жалб қилинган бўлиб, гуруҳда тахминан 300-400 нафар кузатувчи бор. Гуруҳга ҳудуддаги муаммолар ташланади ва масъуллар эътибори қаратилади. Шунингдек, интернет сайтларида, Telegram каналларида чиққан хабарлар ҳам ташланиб, муаммога ечим топилади. Прокурорнинг видеохабари ҳам шу гуруҳга муҳокама учун юборилган бўлиб, бу орқали масъулларни эътиборли бўлишга чақириш мақсад қилинган, — дейди шаҳар ҳокимлиги ахборот хизмати раҳбари.

Масъулнинг қўшимча қилишича, прокурорнинг видеомурожаатида хулоса қилиши кераклиги айтилган Салим ака бу — шаҳар ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Салим Анорбоев, Алимжон ака эса Алимжон Асқаров бўлиб, шаҳар ХТБ мудири вазифасини вақтинча бажарувчи ходим бўлган.

Ўша куни ҳоким ва прокурор, ИИБ раҳбари мактабга борганида 68 нафар ўқитувчидан атиги 5 нафари ишда бўлган. Прокурор ўқитувчилар ишга келмагани учун бекордан бекор ойлик олиб ётишибди деган гапни айтган. Аслида қорни ўқитувчилар тозаласин демаган. Мактабда 10 нафар техник ходим бўлган. Шулар орқали тозалаш назарда тутилган, — дейди Гулшода Шаҳанова.

Прокурорнинг видеочиқишидан сўнг Telegram каналларида ўқитувчиларнинг мактаб ҳовлисини қордан тозалаётгани тасвирланган фотолар ҳам тарқалди.

Кўпчилик мазкур фотоларни айнан Ангрен шаҳар прокурорининг қилмиши деб изоҳлаган бўлса, масъуллар, хусусан, Тошкент вилояти прокуратураси ҳам мактаб ҳовлисидаги қорлар махсус техникалар ёрдамида, шунингдек, Ободонлаштириш ходимлари кўмагида тозаланганини маълум қилди.

«Дарё» нашрининг бу ҳақдаги саволига жавоб берган Ангрен шаҳридаги 22-мактаб раҳбарияти эса мактаб ҳовлисини муздан тозалаётган ўқитувчилар сурати айнан шу мактабда тасвирга олинганини, ўқитувчилар ўз хоҳиши билан тозалаш ишларини қилганини, шу пайтга қадар ҳам бундай ҳашарлар бўлганию, ўқитувчилар бундан норози бўлмаганини билдирди.