Vikipediya 10 yil ichida birinchi marta sayt dizaynini o‘zgartirdi

Ko‘p tilli onlayn ensiklopediya Vikipediya 10 yil ichida birinchi marta platforma dizaynini o‘zgartirdi. Bu haqda Wikimedia jamg‘armasi xabar berdi.

“Yangilangan interfeys Vikipediyaning inglizcha versiyasi 15-yanvarda 22 yilligini nishonlaganidan so‘ng taqdim etildi. U hamma uchun ma’lumot olish, o‘rganish va almashishni osonlashtirish maqsadida yaratilgan”, — deyiladi press-relizda.

Asosiy o‘zgarishlar — qidiruvni soddalashtiradigan mundarijaning yangi versiyasi va ensiklopediyaning tilni almashtirish vositalarining yangilanishi.

“Saytning avvalgi funksiyalaridan hech biri olib tashlanmadi”, — deyiladi xabarda.

Vikipediya — bu onlayn ensiklopediya bo‘lib, unda barcha internet foydalanuvchilari maqolalar yaratish va tahrirlash imkoniyatiga ega.

Hozirgi vaqtda u o‘xshash ensiklopediyalar orasida qamrovi va maqolalar soni bo‘yicha eng katta bo‘lib, 306 til bo‘limini o‘z ichiga oladi.

Umuman olganda, Vikipediyada 55,6 million maqola bor. Saytga tashrif buyuruvchilar soni oyiga taxminan 1,7 milliard kishini tashkil qiladi.