Ilon Maskning teskari da’volariga qaramay, Twitter’da xodimlarni qisqartirish davom etmoqda

Ilon Mask inkor etayotganiga qaramay, Twitter’da xodimlarni ishdan bo‘shatish jarayoni kuchayib bormoqda. Bu haqda Business Insider xabar berdi.

Ma’lumotlarga ko‘ra, reklama va monetizatsiyaga mas’ul bo‘lgan o‘nlab xodimlar ikki hafta oldin kompaniyani tark etishga majbur bo‘lgan. O‘tgan hafta Singapur va Avstraliyada joylashgan ofislarda ham ishdan bo‘shatish holatlari sodir bo‘lgan.

Bundan tashqari, yaqin haftada yana 50 nafar xodim kompaniyani tark etadi.

Mask Twitter’ning AQSHdagi ko‘plab xalqaro vakolatxonalari va uning ayrim bo‘linmalarini yopishni rejalashtirmoqda. Bu esa kompaniya xodimlarining 2000 kishigacha qisqarishiga olib kelishi mumkin. Bu so‘nggi 10 yildagi rekord ko‘rsatkichdir.

Twitter bunga izoh berishdan bosh tortdi. Kompaniyaga yaqin manba Maskning ishdan bo‘shatishni to‘xtatish haqidagi va’dalarini haqiqiy baholab bo‘lmasligini ta’kidladi, chunki u “har daqiqada o‘z vaziyatiga mos narsani aytishi mumkin”.

Ilon Mask Twitter’ni sotib olish bo‘yicha kelishuvni 27-oktabr kuni yakunlab, kompaniya uchun 44 milliard dollar to‘lagan.

Shundan so‘ng tadbirkor ijtimoiy tarmoq xodimlarining yarmiga yaqinini ishdan bo‘shatdi, qolganlarni esa yuqori intensivlik bilan ishlash kerakligi haqida ogohlantirdi.

OAV xabarlariga ko‘ra, ushbu voqealar fonida platforma faoliyatini saqlab qolish uchun muhim bo‘lgan ko‘plab xodimlar Twitter’ni tark etgan.