Oliy sudda jamoatchilik bilan hamkorlik markazi tashkil etilib, sud faoliyati haqida OAVga to‘liq axborot taqdim etib boriladi – prezident farmoni

Aholining odil sudlovga erishish imkoniyatlarini yanada kengaytirishga qaratilgan prezident farmonlari 16-yanvar kuni imzolandi. Bular:

• “Odil sudlovga erishish imkoniyatlarini yanada kengaytirish va sudlar faoliyati samaradorligini oshirishga doir qo‘shimcha chora-tadbirlar to‘g‘risida”;
• “Odil sudlov faoliyatini amalga oshirishni samarali tashkil etish bo‘yicha qo‘shimcha chora-tadbirlar to‘g‘risida”gi farmonlar hisoblanadi.

Ushbu farmonlar bilan sudlar faoliyati samaradorligini oshirish choralari belgilanmoqda. Jumladan:

2023-2026-yillarda sud tizimini sifat jihatidan yangi bosqichga olib chiqish bo‘yicha strategiya (farmonga 1-ilova) va uni amalga oshirishga oid harakatlar dasturi (farmonga 2-ilova) tasdiqlangan.

Shuningdek, odil sudlov faoliyatiga tashqi va ichki tarafdan aralashish imkoniyatlarini bartaraf etish choralari ko‘zda tutilmoqda. Xususan:

1. Sudga hurmatsizlik qilganlik uchun ma’muriy javobgarlik choralarini kuchaytirish va jinoiy javobgarlik belgilash;
2. Sudyaning turar joyi, yozishmalari, telefon so‘zlashuvlari bilan bog‘liq tezkor-qidiruv tadbirlari faqat bosh prokuror sanksiyasi asosida o‘tkazilishini belgilash;
3. Sud hujjatlari o‘z vaqtida va to‘liq ijro etilishini ta’minlashga qaratilgan ta’sirchan mexanizmlarni joriy etish.

Bundan tashqari, Oliy sud tuzilmasi mavjud shtatlar doirasida takomillashtirilib, quyidagilar tashkil etilmoqda.

1. Odil sudlov sohasidagi qonunchilikni tahlil qilish departamenti;
2. Axborot kommunikatsiya monitoringi – Vaziyatlar markazi.

Sudning ochiqligi va jamoatchilik bilan mustahkam aloqalarni ta’minlash bo‘yicha yangicha mexanizmlar belgilanmoqda. Oliy sudda Jamoatchilik bilan hamkorlik markazi (PR Markaz) tashkil etilib, uning va quyi sudlar matbuot xizmatlarining asosiy vazifalari etib quyidagilar ko‘rsatilmoqda:

• sud faoliyati haqida OAV va ijtimoiy tarmoqlar orqali muntazam, to‘liq va tezkor ravishda axborot taqdim etib borish;
• axborot makonini doimiy monitoring qilib, tanqidiy va keng muhokama qilinayotgan axborot xurujlariga tezkor munosabat bildirish.

Prokurorlarning sudlardagi ishtirokini takomillashtirish choralari belgilanmoqda. Jumladan, Bosh prokuratura, viloyat, tuman prokuraturalaridagi tegishli bo‘limlar Odil sudlovni amalga oshirishga ko‘maklashish bo‘yicha ixtisoslashgan prokurorlar korpusi etib belgilanmoqda.

Ixtisoslashgan prokurorlar korpusi faoliyati natijadorligini ta’minlash bo‘yicha ta’sirchan choralar belgilanmoqda, xususan:

1. Xodim davlat ayblovini (fuqaroviy da’voni) quvvatlash, o‘zgartirish, undan voz kechish, sudlanuvchiga Jinoyat kodeksi normalarini qo‘llash, jazo turi va me’yorini tayinlash masalalari yuzasidan fikrini sudga bayon qilishda mustaqil ekanligi belgilanmoqda;
2. Ixtisoslashgan prokurorlar korpusi faoliyatiga boshqa sohaviy prokurorlar aralashuvi taqiqlanib, korpus xodimlarini rotatsiya qilish uchun Bosh prokuror o‘rinbosari roziligi shartligi ko‘zda tutilmoqda;
3. Har bir viloyat prokuraturasida ixtisoslashgan prokurorlar korpusi va boshqa yo‘nalishlarda uzoq yillar faoliyat ko‘rsatgan tajribali xodimlardan iborat maslahat kengashlari tashkil etilmoqda.