Олий судда жамоатчилик билан ҳамкорлик маркази ташкил этилиб, суд фаолияти ҳақида ОАВга тўлиқ ахборот тақдим этиб борилади – президент фармони

Аҳолининг одил судловга эришиш имкониятларини янада кенгайтиришга қаратилган президент фармонлари 16 январь куни имзоланди. Булар:

• «Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида»;
• «Одил судлов фаолиятини амалга оширишни самарали ташкил этиш бўйича қўшимча чора-тадбирлар тўғрисида»ги фармонлар ҳисобланади.

Ушбу фармонлар билан судлар фаолияти самарадорлигини ошириш чоралари белгиланмоқда. Жумладан:

2023-2026 йилларда суд тизимини сифат жиҳатидан янги босқичга олиб чиқиш бўйича стратегия (фармонга 1-илова) ва уни амалга оширишга оид ҳаракатлар дастури (фармонга 2-илова) тасдиқланган.

Шунингдек, одил судлов фаолиятига ташқи ва ички тарафдан аралашиш имкониятларини бартараф этиш чоралари кўзда тутилмоқда. Хусусан:

1. Судга ҳурматсизлик қилганлик учун маъмурий жавобгарлик чораларини кучайтириш ва жиноий жавобгарлик белгилаш;
2. Судьянинг турар жойи, ёзишмалари, телефон сўзлашувлари билан боғлиқ тезкор-қидирув тадбирлари фақат бош прокурор санкцияси асосида ўтказилишини белгилаш;
3. Суд ҳужжатлари ўз вақтида ва тўлиқ ижро этилишини таъминлашга қаратилган таъсирчан механизмларни жорий этиш.

Бундан ташқари, Олий суд тузилмаси мавжуд штатлар доирасида такомиллаштирилиб, қуйидагилар ташкил этилмоқда.

1. Одил судлов соҳасидаги қонунчиликни таҳлил қилиш департаменти;
2. Ахборот коммуникация мониторинги – Вазиятлар маркази.

Суднинг очиқлиги ва жамоатчилик билан мустаҳкам алоқаларни таъминлаш бўйича янгича механизмлар белгиланмоқда. Олий судда Жамоатчилик билан ҳамкорлик маркази (PR Марказ) ташкил этилиб, унинг ва қуйи судлар матбуот хизматларининг асосий вазифалари этиб қуйидагилар кўрсатилмоқда:

• суд фаолияти ҳақида ОАВ ва ижтимоий тармоқлар орқали мунтазам, тўлиқ ва тезкор равишда ахборот тақдим этиб бориш;
• ахборот маконини доимий мониторинг қилиб, танқидий ва кенг муҳокама қилинаётган ахборот хуружларига тезкор муносабат билдириш.

Прокурорларнинг судлардаги иштирокини такомиллаштириш чоралари белгиланмоқда. Жумладан, Бош прокуратура, вилоят, туман прокуратураларидаги тегишли бўлимлар Одил судловни амалга оширишга кўмаклашиш бўйича ихтисослашган прокурорлар корпуси этиб белгиланмоқда.

Ихтисослашган прокурорлар корпуси фаолияти натижадорлигини таъминлаш бўйича таъсирчан чоралар белгиланмоқда, хусусан:

1. Ходим давлат айбловини (фуқаровий даъвони) қувватлаш, ўзгартириш, ундан воз кечиш, судланувчига Жиноят кодекси нормаларини қўллаш, жазо тури ва меъёрини тайинлаш масалалари юзасидан фикрини судга баён қилишда мустақил эканлиги белгиланмоқда;
2. Ихтисослашган прокурорлар корпуси фаолиятига бошқа соҳавий прокурорлар аралашуви тақиқланиб, корпус ходимларини ротация қилиш учун Бош прокурор ўринбосари розилиги шартлиги кўзда тутилмоқда;
3. Ҳар бир вилоят прокуратурасида ихтисослашган прокурорлар корпуси ва бошқа йўналишларда узоқ йиллар фаолият кўрсатган тажрибали ходимлардан иборат маслаҳат кенгашлари ташкил этилмоқда.