Toshkent viloyatining Chirchiq shahrida elektr ta’minoti korxonasi xodimini o‘ldirish bilan qo‘rqitib, tahdid qilgan ayolga jinoyat ishi qo‘zg‘atildi. Bu haqda Bosh prokuratura matbuot xizmati xabar berdi.
Ijtimoiy tarmoqlarda Qashqadaryo viloyatida bir guruh fuqarolar elektr energiyasi ta’minotida uzilishlar bo‘lganidan norozi bo‘lib, elektr ta’minoti korxonasiga borib, janjal ko‘targani, bir nafar ayol kishi korxona xodimiga pichoq bilan tahdid qilgani haqida videoxabarlar tarqaldi.
Bosh prokuratura matbuot xizmatining ma’lum qilishicha, voqea Qashqadaryo viloyatida emas, Toshkent viloyatida sodir bo‘lgan.
16-yanvar kuni Chirchiq shahar Elektr ta’minoti korxonasining dispetcherlik punktida bir guruh aholi elektr energiyasi ta’minotida uzilishlar bo‘lganidan norozilik bildirgan vaqtda, 35 yoshli ayol (V.N.) bezorilik harakatlarining oldini olish choralarini ko‘rgan Chirchiq shahar Elektr ta’minoti korxonasi elektr montyoriga qarshilik ko‘rsatib, o‘zidagi oshxona pichog‘i bilan uni o‘ldirish bilan qo‘rqitib, tahdid qilgan.
“Hududiy elektr tarmoqlari” matbuot xizmatining bildirishicha, Chirchiq shahar elektr tarmoqlari korxonasi dispetcherlik xizmatiga biriktirilgan Chirchiq shahar IIB xodimlari tomonidan noxush hodisaning oldi olinib, hozirda ushbu holat yuzasidan birlamchi surishtiruv-tergov harakatlari olib borilmoqda.
Elektromontyorga birinchi tibbiy psixologik yordam ko‘rsatilib, tan jarohati yetkazilmagani aniqlangan.
Mazkur holat bo‘yicha Chirchiq shahar IIB huzuridagi Tergov bo‘limi tomonidan V.N.ga nisbatan Jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atilib, hozirda tergov harakatlari olib borilmoqda.
Ushbu moddada uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish jazosi belgilangan.
Izoh (0)