Тошкент вилоятининг Чирчиқ шаҳрида электр таъминоти корхонаси ходимини ўлдириш билан қўрқитиб, таҳдид қилган аёлга жиноят иши қўзғатилди. Бу ҳақда Бош прокуратура матбуот хизмати хабар берди.
Ижтимоий тармоқларда Қашқадарё вилоятида бир гуруҳ фуқаролар электр энергияси таъминотида узилишлар бўлганидан норози бўлиб, электр таъминоти корхонасига бориб, жанжал кўтаргани, бир нафар аёл киши корхона ходимига пичоқ билан таҳдид қилгани ҳақида видеохабарлар тарқалди.
Бош прокуратура матбуот хизматининг маълум қилишича, воқеа Қашқадарё вилоятида эмас, Тошкент вилоятида содир бўлган.
16 январь куни Чирчиқ шаҳар Электр таъминоти корхонасининг диспетчерлик пунктида бир гуруҳ аҳоли электр энергияси таъминотида узилишлар бўлганидан норозилик билдирган вақтда, 35 ёшли аёл (B.Н.) безорилик ҳаракатларининг олдини олиш чораларини кўрган Чирчиқ шаҳар Электр таъминоти корхонаси электр монтёрига қаршилик кўрсатиб, ўзидаги ошхона пичоғи билан уни ўлдириш билан қўрқитиб, таҳдид қилган.
«Ҳудудий электр тармоқлари» матбуот хизматининг билдиришича, Чирчиқ шаҳар электр тармоқлари корхонаси диспетчерлик хизматига бириктирилган Чирчиқ шаҳар ИИБ ходимлари томонидан нохуш ҳодисанинг олди олиниб, ҳозирда ушбу ҳолат юзасидан бирламчи суриштирув-тергов ҳаракатлари олиб борилмоқда.
Электромонтёрга биринчи тиббий психологик ёрдам кўрсатилиб, тан жароҳати етказилмагани аниқланган.
Мазкур ҳолат бўйича Чирчиқ шаҳар ИИБ ҳузуридаги Тергов бўлими томонидан B.Н.га нисбатан Жиноят кодексининг 277-моддаси 3-қисми «г» банди (жамоат тартибини сақлаш вазифасини бажариб турган ҳокимият вакили ёки жамоатчилик вакилига ёхуд безорилик ҳаракатларининг олдини олиш чорасини кўрган бошқа фуқароларга қаршилик кўрсатиб содир этилган безорилик) билан жиноят иши қўзғатилиб, ҳозирда тергов ҳаракатлари олиб борилмоқда.
Ушбу моддада уч йилдан беш йилгача озодликни чеклаш ёхуд уч йилдан беш йилгача озодликдан маҳрум қилиш жазоси белгиланган.
Изоҳ (0)