Bugun, 17-noyabr kuni bo‘lib o‘tayotgan Oliy Majlis Qonunchilik palatasi yig‘ilishida “Moliyaviy iste’mol krediti berish tizimi takomillashtirilishi munosabati bilan ‘Iste’mol krediti to‘g‘risida’gi qonunning 15-moddasiga o‘zgartish kiritish haqida”gi qonun loyihasi ikkinchi o‘qishda ko‘rib chiqildi. Bu haqda palata matbuot xizmati xabar berdi.
Ma’lum qilinishicha, qonun loyihasi bilan xususiy tadbirkorlikni yanada rivojlantirish, fuqarolarga qo‘shimcha qulayliklar yaratish maqsadida iste’mol kreditidan foydalanish mexanizmi kengaytirilmoqda. Hujjat asosida O‘zbekistonda ishlab chiqarilmagan tovarlar (xizmatlar) uchun ham iste’mol krediti ajratishga ruxsat berilyapti.
Majlisda keyingi paytlarda iste’mol kreditlari uchun talab ortib borayotgani, ammo amaldagi qonunda O‘zbekistonda ishlab chiqarilmaydigan tovarlar (xizmatlar)ga iste’mol krediti berish cheklangani takidlangan. Bu esa aholining o‘z hisobidan kredit evaziga xarid qiladigan mahsulotini tanlash imkoniyatini kamaytirishi bilan birga, iste’molchilar huquq va manfaatlari buzilishiga olib kelgan.
Xabarga ko‘ra, qonun loyihasida “Iste’mol krediti to‘g‘risida”gi qonunga jismoniy va yuridik shaxslar tomonidan sotiladigan tovarlar (xizmatlar) hamda O‘zbekistondan tashqarida ishlab chiqarilgan tovarlar (xizmatlar) uchun moliyaviy iste’mol kreditlari berish imkoniyatini nazarda tutuvchi o‘zgartishlar kiritilmoqda.
Qonun loyihasi deputatlar tomonidan qabul qilingan.
Izoh (0)