Буркина-Фасо шимолидаги Сўм вилоятида 12 ва 13 январь кунлари қуролланган шахслар 50 га яқин аёлни ўғирлаб кетди. Бу ҳақда Al Jazeera хабар берди.
Қуролланган эркаклар аёлларни Лики қишлоғи ташқарисида мева тераётган пайтда қўлга олган. Ҳукуматнинг душанба кунги баёнотида айтилишича, «барча бегуноҳ қурбонларни соғ-саломат топиш мақсадида қидирув бошланган». Армия томонидан ҳозиргача олиб борилган қидирув жараёни муваффақиятсиз якунланган.
Дунёнинг энг қашшоқ давлатларидан бири бўлган Буркина-Фасо 2015 йилда қўшни Малидан тарқалиб кетган «Ал-Қоида» ва ИШИДга алоқадор қуролли гуруҳларнинг зўравонлик ҳаракатларининг олдини олиш учун курашмоқда. Бу жараёнда минглаб тинч аҳоли ва хавфсизлик кучлари аъзолари ҳалок бўлган, икки миллионга яқин одам ўз уйини тарк этиб, вақтинчалик лагерларда яшашга мажбур бўлган.
2021 йил август ойида Буркина-Фасода автомашиналар карвонига уюштирилган ҳужум чоғида 80 киши, жумладан, 65 нафар тинч аҳоли вакили ҳалок бўлганди.
Изоҳ (0)