O‘zbekistonda ish haqining bir qismini qishloq xo‘jaligi mahsulotlari bilan to‘lash rejalashtirilmoqda

O‘zbekistonda ish haqining bir qismini qishloq xo‘jaligi mahsulotlari bilan to‘lash rejalashtirilmoqda. Kambag‘allikni qisqartirish va bandlik vazirligi bu tartib qaysi turdagi ishchilar uchun amal qilishini tushuntirdi

Qayd etilishicha, yangi tahrirdagi Mehnat kodeksining 256-moddasi to‘rtinchi qismiga ko‘ra mehnatga natura shaklida haq to‘lash taqiqlangan, bundan hukumat tomonidan belgilangan hollar mustasno ekani belgilangan.

Qaror loyihasida ushbu mustasno holatlar belgilanmoqda, ya’ni bu tartib qishloq xo‘jaligi tovar ishlab chiqaruvchilari tomonidan yetishtirilgan va qayta ishlangan qishloq xo‘jaligi mahsulotlari uy ishchisini oziq-ovqat va uy-joy bilan ta’minlash uchun amal qiladi.

Qishloq xo‘jaligi tovar ishlab chiqaruvchilari bo‘lgan ish beruvchilar tomonidan o‘zlari yetishtirilgan va qayta ishlangan qishloq xo‘jaligi mahsulotlarini o‘z xodimlariga, o‘ziga xizmat ko‘rsatilishi va uy xo‘jaligini yuritishda yordamlashish maqsadida uy xizmatchilarini yollagan ish beruvchilar tomonidan uy ishchilariga oziq-ovqat va uy-joy bilan ta’minlanishi mehnatga natura shaklida haq to‘lashga ruxsat etilishi mumkin.

Bunda, quyidagi talablar mavjud bo‘lishi belgilanmoqda:

• Xodim rozi bo‘lishi, ya’ni ish haqini natura shaklida to‘lash mehnat sharnomada ko‘rsatilishi;
• Xodimning oylik ish haqining 30 foizidan ortiq bo‘lmasligi;
• xodim shaxsiy iste’moli va uning oilasi uchun mos va foydali bo‘lishi;
• Qishloq xo‘jaligi tovar ishlab chiqaruvchilari tomonidan taqdim etilayotgan tovar narxi uning tannarxidan yuqori bo‘lmasligi;
• Uy ishchisining ish beruvchilari tomonidan taqdim etilayotgan tovar haqiqiy bozor narxidan yuqori narxda taqdim etilmasligi lozim.