“Daryo” nashri 13-yanvarda O‘zbekiston va jahonda sodir bo‘lgan eng muhim voqealarni e’tiboringizga havola etadi.
AQSH NATOning sharqiy qanotiga tanklar va jangovar mashinalarni jo‘natishni boshladi, kelasi hafta Ukraina harbiylari Germaniyada harbiy o‘quv mashg’ulotlarini boshlaydi.
AQSH tanklar va zirhli texnikalarni, jumladan, M1 Abrams va Bradley piyodalar jangovar mashinalarini NATOning sharqiy qanotiga ko‘chirishni boshladi, deb xabar bermoqda Reuters.
11-yanvar kunidan beri Niderlandiyaning Flissingen portiga Amerika armiyasining katta miqdordagi harbiy texnikasi kelmoqda, u yerdan Polsha va Litvaga o‘tkazilmoqda. Amerika tomonidan transferni nazorat qiluvchi polkovnik Robert Kellamning aytishicha, gap taxminan 1 250 ta texnika haqida bormoqda.
11-yanvar kuni Polsha prezidenti Anjey Duda xalqaro koalitsiya tarkibida Germaniyaning Leopard tanklarini Kiyevga o‘tkazish to‘g‘risida qarorini e’lon qilgandi, Qo‘shma Shtatlar esa mamlakatga Bradely piyoda jangovar mashinalarini berishini bildirgan.
Ayni vaziyatda Ukraina harbiylarini AQSHning Bradley piyodalar jangovar mashinasi bilan ishlashga o‘rgatish kelasi hafta boshlanishi kerak. Pentagon matbuot kotibi Patrik Rayderning ma’lum qilishicha: AQSH o‘quv mashg‘ulotlarni “oylar emas, haftalar ichida” yakunlashni rejalashtirmoqda.
Rossiya Ukraina bilan vositachilarsiz muzokaralar olib borishni yoqlab chiqmoqda
Rossiya va Ukraina o‘rtasida muzokaralar qayta boshlangan taqdirda, ular, katta ehtimol bilan, bevosita bo‘ladi, vositachilar ishtirok etmasligi eng yaxshi variant bo‘lgan bo‘lardi, deya ma’lum qildi Rossiya Tashqi ishlar vazirligining MDH mamlakatlari bo‘yicha 2-departamenti direktori Aleksey Polishuk. Bu haqda “TASS” xabar bermoqda.
Rossiya tomoni ehtimoliy muzokaralarni kelajakda bevosita Ukraina tomoni bilan olib borilishiga to‘g‘ri kelishiga tayyormi, yo‘qmi degan savolga javob berar ekan direktor:“Tajribalar shuni ko‘rsatadiki, g‘arblik vositachilar ko‘pincha o‘z maqsadlarini ko‘zlab, nizoni tartibga solish uchun emas, o‘z siyosiy va iqtisodiy manfaatlari yo‘lida harakat qilib, muzokaralarning borishiga ta’sir o‘tkazishga harakat qiladi”, — deya fikr bildirgan.
Dekabr boshlarida Rossiya tashqi ishlar vaziri Sergey Lavrov “jiddiy takliflar” kelib tushsa va Rossiya talablari e’tiborga olinsa, Moskva Ukrainadagi nizoni hal qilish uchun muzokaralarda qatnashishga tayyorligini ma’lum qilgan edi.
Ukrainada harbiy operatsiya boshlanganidan buyon Moskva va Kiyev muzokaralarning bir nechta raundini olib bordi, ammo muayyan natijalarga erishishga muvaffaq bo‘linmadi. Ikkala tomon ham kelishuvlar amalga oshmaganida bir-birini ayblamoqda
Quramax’ning O‘zbekistondagi litsenziyasi tugatildi. Mazkur ishga doir vakolatli idora va mansabdor shaxslarning xatti-harakati yoki harakatsizligi qonun kuzatuvida
Quramax medikal MCHJga farmatsevtika faoliyatini amalga oshirish uchun berilgan litsenziya faoliyati tugatildi. Bu haqda Oliy sud axborot xizmati xabar qildi.
Toshkent tumanlararo iqtisodiy sudining 2023-yil 13-yanvardagi hal qiluv qarori bilan Quramax medikal MCHJga farmatsevtika faoliyatini amalga oshirish uchun berilgan 2019-yil 10-dekabrdagi P6580-sonli litsenziya bekor qilinishi va qo‘llash uchun yaroqsiz dori vositalari muomaladan chiqarilib, yo‘q qilinishi belgilangan.
Sudning huquqiy ta’sir chorasini qo‘llash to‘g‘risidagi ish bo‘yicha ushbu hal qiluv qarori, agar apellyatsiya shikoyati (protesti) berilmasa, qabul qilinganidan keyin o‘n kun o‘tgach qonuniy kuchga kiradi. Shuningdek, mazkur iqtisodiy ishga doir vakolatli idora va mansabdor shaxslarning xatti-harakati yoki harakatsizligi yuzasidan qonun talablari buzilganligi bo‘yicha xususiy ajrim chiqarilib, Toshkent shahar prokuraturasiga yuborilishi belgilangan.
Izoh (0)