«Дарё» нашри 13 январда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
АҚШ НАТОнинг шарқий қанотига танклар ва жанговар машиналарни жўнатишни бошлади, келаси ҳафта Украина ҳарбийлари Германияда ҳарбий ўқув машғулотларини бошлайди.
АҚШ танклар ва зирҳли техникаларни, жумладан, М1 Abrams ва Bradley пиёдалар жанговар машиналарини НАТОнинг шарқий қанотига кўчиришни бошлади, деб хабар бермоқда Reuters.
11 январь кунидан бери Нидерландиянинг Флиссинген портига Америка армиясининг катта миқдордаги ҳарбий техникаси келмоқда, у ердан Польша ва Литвага ўтказилмоқда. Америка томонидан трансферни назорат қилувчи полковник Роберт Келламнинг айтишича, гап тахминан 1 250 та техника ҳақида бормоқда.
11 январь куни Польша президенти Анжей Дуда халқаро коалиция таркибида Германиянинг Леопард танкларини Киевга ўтказиш тўғрисида қарорини эълон қилганди, Қўшма Штатлар эса мамлакатга Браделй пиёда жанговар машиналарини беришини билдирган.
Айни вазиятда Украина ҳарбийларини АҚШнинг Bradley пиёдалар жанговар машинаси билан ишлашга ўргатиш келаси ҳафта бошланиши керак. Пентагон матбуот котиби Патрик Райдернинг маълум қилишича: АҚШ ўқув машғулотларни «ойлар эмас, ҳафталар ичида» якунлашни режалаштирмоқда.
Россия Украина билан воситачиларсиз музокаралар олиб боришни ёқлаб чиқмоқда
Россия ва Украина ўртасида музокаралар қайта бошланган тақдирда, улар, катта эҳтимол билан, бевосита бўлади, воситачилар иштирок этмаслиги энг яхши вариант бўлган бўларди, дея маълум қилди Россия Ташқи ишлар вазирлигининг МДҲ мамлакатлари бўйича 2-департаменти директори Алексей Полишук. Бу ҳақда «ТАСС» хабар бермоқда.
Россия томони эҳтимолий музокараларни келажакда бевосита Украина томони билан олиб борилишига тўғри келишига тайёрми, йўқми деган саволга жавоб берар экан директор:«Тажрибалар шуни кўрсатадики, ғарблик воситачилар кўпинча ўз мақсадларини кўзлаб, низони тартибга солиш учун эмас, ўз сиёсий ва иқтисодий манфаатлари йўлида ҳаракат қилиб, музокараларнинг боришига таъсир ўтказишга ҳаракат қилади», — дея фикр билдирган.
Декабрь бошларида Россия ташқи ишлар вазири Сергей Лавров «жиддий таклифлар» келиб тушса ва Россия талаблари эътиборга олинса, Москва Украинадаги низони ҳал қилиш учун музокараларда қатнашишга тайёрлигини маълум қилган эди.
Украинада ҳарбий операция бошланганидан буён Москва ва Киев музокараларнинг бир нечта раундини олиб борди, аммо муайян натижаларга эришишга муваффақ бўлинмади. Иккала томон ҳам келишувлар амалга ошмаганида бир-бирини айбламоқда
Quramax’нинг Ўзбекистондаги лицензияси тугатилди. Мазкур ишга доир ваколатли идора ва мансабдор шахсларнинг хатти-ҳаракати ёки ҳаракатсизлиги қонун кузатувида
Quramax medical МЧЖга фармацевтика фаолиятини амалга ошириш учун берилган лицензия фаолияти тугатилди. Бу ҳақда Олий суд ахборот хизмати хабар қилди.
Тошкент туманлараро иқтисодий судининг 2023 йил 13 январдаги ҳал қилув қарори билан Quramax medical МЧЖга фармацевтика фаолиятини амалга ошириш учун берилган 2019 йил 10 декабрдаги П6580-сонли лицензия бекор қилиниши ва қўллаш учун яроқсиз дори воситалари муомаладан чиқарилиб, йўқ қилиниши белгиланган.
Суднинг ҳуқуқий таъсир чорасини қўллаш тўғрисидаги иш бўйича ушбу ҳал қилув қарори, агар апелляция шикояти (протести) берилмаса, қабул қилинганидан кейин ўн кун ўтгач қонуний кучга киради. Шунингдек, мазкур иқтисодий ишга доир ваколатли идора ва мансабдор шахсларнинг хатти-ҳаракати ёки ҳаракатсизлиги юзасидан қонун талаблари бузилганлиги бўйича хусусий ажрим чиқарилиб, Тошкент шаҳар прокуратурасига юборилиши белгиланган.
Изоҳ (0)