“Xizmat mashinasida ketayotganingizda yo‘ldagi fuqaroni, maktab o‘quvchisini ko‘rsangiz, manziliga olib borib qo‘ying”. Zoir Mirzayev toshkentlik rahbarlarni odamgarchilik qilishga chaqirdi

Toshkent viloyati hokimi Zoir Mirzayev viloyatdagi tashkilot rahbarlarini odamgarchilik qilishga chaqirdi.

Ta’kidlanishicha, 11-yanvar kuni Toshkent viloyati hokimi Zoir Mirzayev Zoom platformasi orqali yig‘ilish o‘tkazgan. Unda viloyat rahbari ayni paytda dolzarb bo‘lib turgan bir qator masalalarga to‘xtalib, mas’ullarga topshiriqlar bergan.

Yig‘ilishda hokim o‘zi bilan sodir bo‘lgan holat haqida to‘xtalib, 71 yoshli onaxonni xizmat avtomobilida shifoxonaga olib borib qo‘yganini, onaxon uzoq duo qilganini eslab, odamlar yo‘llarda jamoat transportlarini kutib, qiynalayotganini, rahbarlar yo‘l-yo‘lakay ularni olib ketsa savob bo‘lishini aytgan.

Hamma rahbarlar xizmat mashinasida yo‘l bo‘yida kutib turgan yo‘lovchini ko‘rsa, mashinasida manzilga olib ketsin. Agar kasalxonaga borayotgan bo‘lsa, joyigacha eltib qo‘yinglar. Hech narsa qilmaydi, savob bo‘ladi, — deydi Zoir Mirzayev.

Toshkent viloyati hokimi faoliyatini boshlayotgan maktablarga boradigan yo‘llarni qor va muzdan tozalashga barcha kuch va vositalar safarbar qilinishi shartligini bildirgan.

Maktablarning isitish tizimlarini o‘rganish, ayniqsa, qozonxonalarda suv muzlab qolmaganini tekshirish kerak. Ko‘mir bilan isitiladigan maktab pechlarini esa bir kun avvaldan yoqmasa, isimaydi. Xalq ta’limi boshqarmasi har ikki soatda faoliyat boshlagan yoki boshlash arafasida turgan maktablardagi holat bo‘yicha viloyat hokimiga axborot berib boradi. Viloyat hokimligi tomonidan biriktirilgan vakillar o‘sha hududlarda bo‘ladi, maktabga kiradi, boshqaruv servis kompaniyalari, kasalxonalarga kiradi, vaziyatni nazorat qilishda hokimlarga yordam beradi, — deydi hokim.

Bozorda narx-navolarning nazoratini bir daqiqa ham susaytirilmasligimiz kerak. Bekobod shahrida yog‘ narxi sun’iy ko‘tarilgan. Holbuki, zaxiramizda yetarli darajada yog‘ mahsulotimiz bor, — degan viloyat rahbari.