Qashqadaryoda o‘zini departament xodimi deb tanishtirib, maktab direktoridan pora talab qilgan shaxs ushlandi

Qashqadaryo viloyati Chiroqchi tumanida Iqtisodiy jinoyatlarga qarshi kurashish departamentining soxta xodimi qo‘lga tushdi.

Qayd etilishicha, Bosh prokuratura huzuridagi departamentning Shaxsiy xavfsizlik bo‘limi hamda Qashqadaryo viloyat boshqarmasi tomonidan Chiroqchi tumanidagi umumiy o‘rta ta’lim maktabi direktorining murojaatiga asosan tezkor tadbir o‘tkazilgan. Unda o‘zini Bosh prokuratura huzuridagi departamentning Qashqadaryo viloyat boshqarmasi tezkor xodimi A. deb tanishtirgan shaxs maktab direktori Z.R.dan maktabda tekshirish o‘tkazmaslik evaziga 400 dollar pora talab qilgani aniqlangan. U shu puldan 2,2 million so‘mni turmush o‘rtog‘ining plastik kartasiga o‘tkazib olgan vaqtida ashyoviy dalillar bilan ushlangan.

Tergovga qadar tekshiruv davomida o‘zini departament xodimi deb tanishtirgan fuqaro aslida hech qayerda ishlamaydigan, muqaddam firibgarlik va boshqa jinoyatlari uchun sudlangan Koson tumanida yashovchi A.T. ekani ma’lum bo‘lgan.

Holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilgan. Hozirda viloyat prokuraturasiga yuborilgan.