Vazirlar Mahkamasining 30.12.2022 yildagi “Olimpiya va paralimpiya sport turlariga tayyorlash markazlari faoliyatini tashkil etish chora-tadbirlari to‘g‘risida”gi 731-son qarori qabul qilindi. Bu haqda Norma axborot-huquqiy portali xabar qildi.
Qayd etilishicha, Olimpiya va paralimpiya markazlari bu — o‘rta va professional davlat sport-ta’lim muassasasi. Ularning faoliyati yuqori malakali mutaxassislar va sportning olimpiya va paralimpiya turlari bo‘yicha terma jamoalarni shakllantirish uchun sport zaxirasini tayyorlashga yo‘naltiriladi.
2022/2023-o‘quv yilida Respublika olimpiya va paralimpiya sport turlariga tayyorlash markazining o‘quvchi-sportchilari soni 750 nafarni, hududiy markazlarning o‘quvchi-sportchilari soni 600 nafarni tashkil etadi. 2023/2024-o‘quv yilidan boshlab Respublika markazining o‘quvchilari soni 600 nafarni, hududiy markazlarning o‘quvchilari soni 450 nafarni tashkil etadi.
Markazlarda o‘quvchilar va ular xodimlarini qisqartirish natijasida bo‘shab qoladigan budjet mablag‘lari ushbu markazlar sportchilarini oziq-ovqat bilan ta’minlashni yanada yaxshilash va trenerlarni rag‘batlantirish uchun yo‘naltiriladi.
Olimpiya va Paralimpiya kollejlari va markazlariga umumiy o‘quvchi-sportchilar soniga nisbatan O‘zbekiston Milliy paralimpiya qo‘mitasi tavsiyasiga asosan jismoniy imkoniyati cheklangan va nogironligi bo‘lgan o‘quvchi-sportchilar uchun 10 foizgacha qo‘shimcha kvotalar belgilanadi.
Hujjat bilan quyidagilar tasdiqlangan:
- Olimpiya va paralimpiya sport turlariga tayyorlash markazlari ro‘yxati;
- Olimpiya va paralimpiya sport turlariga tayyorlash markazlari to‘g‘risidagi nizom;
- Olimpiya va paralimpiya sport turlariga tayyorlash markazlariga o‘quvchilarni qabul qilish, attestatsiyadan o‘tkazish va ularning o‘qishini ko‘chirish tartibi to‘g‘risidagi nizom.
Izoh (0)