O‘zbekiston Musulmonlari idorasi raisining birinchi o‘rinbosari Homidjon domla Ishmatbekov fuqarolarni folbinlarga borishdan qaytarib, bu Islom dinida taqiqlangan amal ekanini aytdi.
Folbinga borish — dinimiz qaytargan amal, eng og‘ir gunoh, insonni iymondan ayiradigan, mo‘minni dindan chiqaradigan ish. Folbinlik — bu Alloh taologa xos bo‘lgan g‘aybni bilishga da’vo qilish demakdir.Folbinlik — yolg‘onchilik, Alloh nomidan yolg‘on to‘qishlik. Payg‘ambarimiz “Yolg‘onchi mening ummatim emas”, deganlar. Folbinlarda aynan mana shu xislat mujassam.
Chunki aslida ular aytayotgan gapning haqiqati yo‘q. Ba’zi insonlar payg‘ambarimizga borib, “Rasullulloh, folbinlarning ba’zi gaplari rost chiqib qoladi-ku?”, deganlarida, u zot “Jin, shaytonlar folbinga olib kelib, xabarlarni yetkazganda o‘zidan yana 99 tani qo‘shib, 100 ta narsani aytadi. Shu uchun orasida farishtalardan eshitib qolgan ba’zi bir xabarlarigina to‘g‘ri chiqib qolishi mumkin. Bu sizlarni chalg‘itmasin”, — deganlar.
Mo‘min-musulmonlar har qanday ehtioji, talabi bo‘lsa, duoni ijobat qilguvchi, ehtiyojni to‘la-to‘kis qondirguvchi, “Duo qiling, ijobat qilaman” degan va’dasini beruvchi Allohga iltijo qilishi kerak.
Ayniqsa, bizda ayol kishilar orasida biror mushkulini ko‘tarishni so‘rab, farzandlarining baxti ochilishini so‘rab folbinlarga borish holatlari mavjud. Avvalo, har kim o‘zi uchun o‘zi javob beradi. Lekin Alloh erkaklarni ayollarga rahbar qilgan, oilada bosh qilgan. Ana shunday gunohga borgan paytda erkak ayolini to‘xtatishi kerak, ularga nasihat qilishi kerak.
Folbinlarga aytadiganimiz, bu kasbingizni tashlang, pulini yetimlarga tarqatib yuboring. Halol kasb qilishga o‘ting. Qachongacha musulmonlarni aldaysiz, oilangizga harom yedirasiz?, — deydi Homidjon Ishmatbekov.
Izoh (0)