Беларусь президентлигига собиқ номзод, фаолияти тугатилган «Ҳақиқатни айт» жамоат бирлашмаси ҳамраиси Андрей Дмитриев ҳибсга олинди. Бу ҳақда «Зеркало» нашри ва «Весна» инсон ҳуқуқлари маркази (Беларусда экстремистик деб тан олинган) хабар бермоқда.
Сиёсатчининг таниши «Зеркало»га айтишича, унинг ҳибсга олиниши сабаби номаълумлигича қолмоқда, Дмитриевнинг ўзи телефонга жавоб бермаяпти.
Андрей Дмитриев 2020 йилги президентлик сайловларида Беларуснинг амалдаги президенти Александр Лукашенконинг тўрт нафар рақибидан бири эди. Мамлакат Марказий сайлов комиссиясига кўра, у 1,2 фоиз овоз олган. Сайлов кампанияси давомида у мухолифатчиларни ёқлаб чиққан.
У ҳамраислик қилган «Ҳақиқатни айт» уюшмаси ташкилот фаолиятида аниқланган қонунбузарликлар туфайли 2021 йил октябрь ойида Беларусь Олий суди томонидан тугатилган эди. Дмитриевнинг ўзи аввалроқ ҳар қандай суд қарорига қарамай «Ҳақиқатни айт» вакиллари ўз фаолиятини давом эттиришини айтганди.
Беларусда президентлик сайловлари 2020 йил 9 август куни бўлиб ўтган. Лукашенко 80,10 фоиз овоз билан ғалаба қозонди, Светлана Тихановская 10,12 фоиз овоз билан иккинчи ўринни эгаллади. Расмий натижалар эълон қилингач, мамлакатда бир неча ой давом этган оммавий норозилик намойишлари бошланди. Оқибатда кўплаб мухолифат етакчилари ҳибсга олинди ёки мамлакатни тарк этди.
Дмитриев аввалги сафар 2022 йилнинг августида ҳибсга олинган, бироқ кейинроқ қўйиб юборилган эди.
Изоҳ (0)