“Yuksalish” harakati bog‘cha va maktablarda o‘qishni keyingi haftadan boshlashga chaqirdi

“Yuksalish” harakati anomal sovuq ob-havo sharoiti sababli O‘zbekistonda bog‘cha va maktablar ishini boshlashni kechiktirishga chaqirdi.

“Biz mahalliy davlat hokimiyati organlari va ta’lim jarayonlariga mas’ul hududiy idoralarni maktabgacha va maktab ta’limi muassasalarida o‘qish jarayonlarini keyingi haftadan boshlash masalasini ko‘rib chiqishga chaqiramiz.

Avvalo, anomal sovuq va yog‘ingarchilik sharoitida o‘quvchilarning ta’lim muassasiga yetib kelishi keskin qiyinlashadi. Ayrim qishloqlarda bolalar bir necha kilometr piyoda yurib maktabga qatnashini inobatga olish zarur”, — deydi “Yuksalish” umummilliy harakati raisi Bobur Bekmurodov.

Uning qayd etishicha, murojaatlarga ko‘ra, qator hududlarda maktabgacha va maktab ta’limi muassasalarida isitish tizimlari to‘laqonli yo‘lga qo‘yilmagan.

O‘qishni boshlashning aniq muddatini belgilash qarori nafaqat ta’lim muassasalari ma’muriyati, balki ota-onalar va pedagogik tarkib bilan maslahatlashgan holda qabul qilinishi lozim.

Ob-havo haroratining keskin tushib ketishi sababli maktab o‘quvchilarining qishki ta’til kunlari uzaytirilib, darslar 2023- yilning 18-yanvaridan boshlanishi belgilangandi. 10-yanvar kuni ayrim hududlarda, xususan, Xorazm va Andijon viloyatlarida  darslar 11-yanvardan boshlanishi haqida xabarlar e’lon qilindi.

“O‘zgidromet” prognoziga ko‘ra, anomal sovuq ob-havo hafta oxirigacha saqlanib qoladi.

Mavzuga doir: O‘zbekistonda OTM, texnikum, kollej va akademik litseylarda darslar 11-yanvardan bosqichma-bosqich boshlanadi