Surxondaryo viloyati Boysun tumanida shifokor kaltaklandi. Holat aks etgan video ijtimoiy tarmoqlarda tarqaldi.
Viloyat IIB matbuot xizmatining ma’lum qilishicha, 9-yanvar kuni 14:30 larda Boysun tumani “Kosiblar” mahallasida joylashgan Boysun tumani tibbiyot birlashmasida shifokor vazifasida ishlovchi F.J.ni fuqaro Sh.X. urib tan jarohati yetkazgan.
Sog‘liqni saqlash vazirligi matbuot xizmatining bildirishicha, ular o‘rtasida shaxsiy masala yuzasidan tortishuv kelib chiqqan. Oqibatda kelishmovchilik janjalga aylanib, shifokor olgan tan jarohati tufayli hushini yo‘qotgan.
So‘ng jabrlanuvchi tuman tibbiyot birlashmasining shoshilinch tibbiy yordam bo‘limiga burun suyagining yopiq sinishi, o‘ng ko‘z olmasi kontuziyasi, o‘ng yuqori jag‘ jarohati tashxisi bilan yotqizilgan.
Hozir shifokorning ahvoli o‘rta og‘ir. Davo muolajalari belgilangan standartlar asosida olib borilmoqda.
Mazkur holat yuzasidan 10-yanvar kuni Boysun tuman IIB huzuridagi Tergov guruhi tomonidan fuqaro Sh.H. va Sh.X.ga nisbatan Jinoyat kodeksining 277-modda 2-qismining “b” bandi (bir guruh shaxslar tomonidan bezorilik) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)