Jizzax va Surxondaryoda 11-yanvardan boshlab maktablar ochilishi xabar berildi. Surxondaryolik mas’ullar buni tasdiqlagan bo‘lsa, jizzaxliklar rad etdi

Jizzax va Surxondaryo viloyatida xalq ta’limi mas’ullari maktab direktorlariga Telegram orqali xabar yo‘llab, 11-yanvardan boshlab umumta’lim maktablarida o‘qishlar boshlanishini, mas’ullar sinfxonani isitib, darsga tayyor bo‘lishi kerakligini aytgan. Bu haqda “Daryo” o‘quvchilari xabar berdi.

Jumladan, Jizzax shahar xalq ta’limi bo‘limi mudiri Oydin Hamroqulovaning maktab direktorlariga yozgan xabarida shunday deyiladi. “Bugun hamma issiqlik tarmog‘i suvini to‘ldirib, yoqinglar. Qishki ta’til bekor qilindi. Hammaga 11-yanvardan ish boshlanadi. O‘qituvchilar o‘quvchilarni chaqirib, darsga tayyorgarlik ko‘rib kelishsin”.

“Daryo” so‘roviga javob bergan Oydin Hamroqulova bu xabar maktab direktorlariga 9-yanvar kuni kechki payt yozilganini, 10-yanvar kuni ob-havo keskin sovigani va qalin qor yoqqani sababli, bu topshiriq bekor bo‘lganini aytdi.

“Haqiqatan ham 9-yanvar kuni kechki payt viloyat xalq ta’limi boshqarmasi boshlig‘i topshirig‘iga ko‘ra, maktab direktorlariga shunday topshiriq bergandim. Boisi, bizda 9-yanvar kuni ob-havo ancha iliq edi. Qolaversa, maktablarimiz issiq. Shu sabab shunday qarorga kelingandi. Biroq bugun ertalab soat 09:00 da Zoom orqali yig‘ilish o‘tkazilib, bu topshiriq bekor qilingani aytilgan. Bizda ham ta’til davom etadigan bo‘ldi”, — deydi Oydin Hamroqulova.

“Daryo”ga Surxondaryo viloyati xalq ta’limi boshqarmasi boshlig‘i O‘tkir Qurbonov tomonidan maktab direktorlariga yozilgan topshiriq skrinshoti ham kelib tushdi. Unda mas’ul maktab direktorlariga “Barcha maktablar bugun isitish sistemasini suvga to‘ldirib, pechlarni yoqsin. Ertadan o‘qishni boshlaymiz”, — deydi.

Surxondaryo viloyati hokimligi axborot xizmatining “Daryo” so‘roviga javob berishicha, hududdagi maktablarda dars boshlanishi bilan bog‘liq xabarlar to‘g‘ri.

“Hududdagi ob-havo boshqa joylarga nisbatan iliq va maktablarda isitish tizimlari muammolarsiz ishlab turgani inobatga olinib, maktab direktorlariga shunday topshiriqlar berilgan”, — deydi hokimlik axborot xizmati rahbari Murodbek Davlatov.

Telegram messenjeridagi kanallarda ham O‘zbekistondagi maktablarda 11-yanvardan boshlab, dars boshlanishi haqida xabarlar tarqalmoqda. Biroq ayni paytgacha sobiq Xalq ta’limi vazirligi  ayni kundagi Maktabgacha va maktab ta’limi vazirligi mazkur xabarlarni na rad etdi va na tasdiqladi. Vazirlik axborot xizmati “Daryo” so‘roviga ham tez orada rasmiy javob berilishini bildirdi.

“Daryo” voqealar rivojini kuzatishda davom etadi.