“Loaqal 50 ming tirajlik birorta gazetamiz yo‘q” — Alisher Nikimbayev O‘zbekistonda bosma nashrlarga talab kamayib ketayotgani haqida gapirdi

“Daryo” internet-nashri Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 13-soni mavzusi “12 yil xorijda yashagan toshkentlik nigohidagi Toshkent” bo‘lib, dastur mehmoni sifatida xalqaro futbol eksperti Alisher Nikimbayev taklif etildi.

Alisher Nikimbayev o‘zining “Молодёжь Узбекистана” gazetasidagi faoliyatini eslarkan, hozirgi kundagi bosma nashrlar taqdiri uni o‘ylantirayotganini aytdi.

— Internet faqat O‘zbekistonda emas, boshqa joylarda ham ta’sirini ko‘rsatyapti. Lekin boshqa mamlakatlarda baribir gazeta o‘qishadi, hayotini bosma nashrlarsiz tasavvur qilolmaydiganlar bor. Millionga yaqin tirajda chiqyapti gazetalar. Nimadir bor bo‘lsa kerak-da. Hozir o‘zimizda ko‘p o‘qiyman, ‘Yo‘q, bizga gazeta kerakmas, hammasi internetga o‘tdi’, deb yozishadi. Bu noto‘g‘ri gap. Masalan, o‘tgan yili Amerikada bo‘lganman, Qatarda yashaganman, boshqa mamlakatlarga borganman, ularda ham muammolar bor, lekin bizdagidek “gazeta kerak emas” degan gapni eshitmaganman hech qayerda. Demak, bizga, gazetalarimizga nimadir yetishmayapti.

Birinchi ishlagan gazetam “Физкультурник Узбекистана” bo‘lgan, keyin nomi “Sport”ga o‘zgargan. U paytda o‘zbek tilidagi versiyasi 100 ming, rus tilidagisi 30 ming tirajda chiqardi. Vaholanki, 30 yil avval mamlakatimiz aholisi ikki baravar kam bo‘lgan. Hozir loaqal 50 ming tiraj ham yo‘q hech bir gazetada.

Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.