Andijon viloyatidagi hayvonot bog‘ida ayiqqa ovqat berayotgan bog‘ ishchisi ayiq hujumi sabab vafot etgandi. Hayvonot bog‘ida rahbari Aziz Badalov voqea tafsilotlarini aytib berdi.
Uning ta’kidlashicha, hayvonot bog‘ida texnik xavfsizlik qoidalariga to‘liq amal qilinadi. Xodimlar bilan har kuni hayvonlar bilan muloqot qilish bo‘yicha tushuntirish ishlari olib boriladi. Shuningdek, ularning sog‘lig‘i va ruhiy holati ham nazorat qilinadi.
“Ayiq boquvchi A.G. 2021-yil iyun oyidan beri shu yerda ishlab kelgan. Qafasdagi birinchi eshik ochilib, ichkariga kiriladi. Ayiq alohida bo‘lmaga o‘tganda xodim uning joyini tozalab olishi kerak. Lekin bu safar go‘sht olib kelganda ayiqqa bermasdan qafasga kirib borgan.
U go‘shtni tashlab chiqib ketmasdan shu yerda turavergan. Shunda ayiq orqasidan chiqib kelgan. Avvaliga unga hujum qilmagan. Xodim hayvonning yonidan o‘tayotganda vahimaga tushgan. Uni soat 4-5 larda qutqarib oldik”, deydi Andijon hayvonot bog‘i rahbari Aziz Badalov.
Mazkur holat yuzasidan Jinoyat kodeksining 207-moddasi "a" bandi bilan jinoyat ishi qo‘zg‘atilib, Xo‘jaobod tumani ichki ishlar bo‘limi tergov bo‘linmasi tomonidan dastlabki harakatlar olib borilmoqda. Ish bo‘yicha tegishli ekspertiza tayinlanib, mutaxassislar jalb qilingan.
Izoh (0)