«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 13-сони мавзуси «12 йил хорижда яшаган тошкентлик нигоҳидаги Тошкент» бўлиб, дастур меҳмони сифатида халқаро футбол эксперти Алишер Никимбаев таклиф этилди.
Алишер Никимбаев ўзининг «Молодёжь Узбекистана» газетасидаги фаолиятини эсларкан, ҳозирги кундаги босма нашрлар тақдири уни ўйлантираётганини айтди.
— Интернет фақат Ўзбекистонда эмас, бошқа жойларда ҳам таъсирини кўрсатяпти. Лекин бошқа мамлакатларда барибир газета ўқишади, ҳаётини босма нашрларсиз тасаввур қилолмайдиганлар бор. Миллионга яқин тиражда чиқяпти газеталар. Нимадир бор бўлса керак-да. Ҳозир ўзимизда кўп ўқийман, ‘Йўқ, бизга газета керакмас, ҳаммаси интернетга ўтди’, деб ёзишади. Бу нотўғри гап. Масалан, ўтган йили Америкада бўлганман, Қатарда яшаганман, бошқа мамлакатларга борганман, уларда ҳам муаммолар бор, лекин биздагидек «газета керак эмас» деган гапни эшитмаганман ҳеч қаерда. Демак, бизга, газеталаримизга нимадир етишмаяпти.
Биринчи ишлаган газетам «Физкультурник Узбекистана» бўлган, кейин номи «Спорт»га ўзгарган. У пайтда ўзбек тилидаги версияси 100 минг, рус тилидагиси 30 минг тиражда чиқарди. Ваҳоланки, 30 йил аввал мамлакатимиз аҳолиси икки баравар кам бўлган. Ҳозир лоақал 50 минг тираж ҳам йўқ ҳеч бир газетада.Балки, маданият ўзгаргандир, лекин бошқа мамлакатларда ҳам ўзгаряпти-ку, улар эса ҳалигача газета ўқийди. Бу масалада чуқурроқ ўйланиш керак, — дейди Алишер Никимбаев.
Кўрсатувни тўлиқ тарзда «Дарё»нинг YouTube’даги саҳифаси орқали томоша қилиш мумкин.
Изоҳ (0)