2023 йилда Буюк Британия G7 мамлакатлари орасида энг ёмон рецессияга дуч келади ва иқтисодий тикланиш энг заиф бўлади. Бу ҳақда иқтисодчиларга таяниб Financial Times хабар бермоқда.
Нашр томонидан сўровномада 101 нафар эксперт иштирок этди. Кўпчиликнинг фикрича, коронавирус пандемияси ва Украинадаги уруш натижасида юзага келган инфляция зарбаси Буюк Британияда бошқа мамлакатларга қараганда узоқроқ сезилади.
Шу сабабли Англия банки фоиз ставкаларини юқори даражада ушлаб туришга, ҳукумат эса қаттиқ фискал сиёсат олиб боришга мажбур бўлади.
Буюк Британия ялпи ички маҳсулоти пасая бошлади. Баъзи экспертларнинг фикрича, бу кўрсаткич янада тушади. Бу эса озиқ-овқат ва энергия нархининг ошишига дуч келган уй хўжаликларининг даромад даражасига таъсир қилади.
«2023 йилги рецессия пандемиянинг иқтисодий таъсиридан кўра ёмонроқ бўлади», — деди меҳнат бозори мутахассиси Жон Филпот.
Респондентларнинг кўпчилигига кўра, йил охирига келиб инфляция пасаяди, иқтисодиёт эса ўсишга қайтади.
Capital Economics консалтинг компанияси мутахассиси Пол Дейлс 2024 йил 2023 йилга қараганда анча яхши бўлади деб ҳисоблайди.
Consensus Economics компаниясининг прогнозига кўра, келгуси йилда Буюк Британия ялпи ички маҳсулоти 1 фоизга, Еврозонада 0,1 фоизга қисқаради, АҚШда эса 0,25 фоизга ошади.
Миллий статистика бошқармаси маълумотларига кўра, ўтган йилнинг учинчи чорагида Буюк Британия иқтисодиёти олдинги уч ойга нисбатан 0,3 фоизга қисқарди, бу бошқа G7 мамлакатлари орасида энг ёмон кўрсаткичдир.
Октябрь ойида 41 йил давомида рекорд даражадаги 11,1 фоизга етган инфляция ноябрь ойида мамлакатда 10,7 фоизга тушди. Ўша ойда Англия Банки асосий фоиз ставкасини 33 йил ичида энг баланд даражага оширди — 75 базавий пунктга, йиллик 2,25 фоиздан 3 фоизгача.
Изоҳ (0)