Kasallik, teatr, bevaqt o‘lim: “Qor malikasi” ertak-filmi aktyorlarining taqdiri qanday kechdi? (foto)

“Qor malikasi” — ko‘pchilikning bolalikdan sevib tomosha qilgan qishki ertak-filmi. Unda rol o‘ynaganlarning barchasi premyeradan so‘ng mashhurlikka erishdi. Biroq ularning hammasi ham aktyorlik faoliyatini davom ettirmadi. “Noviy ochag” nashri kimlarning hayoti butunlay boshqacha yo‘nalishda ketganini ma’lum qildi.

Qor malikasi — Natalya Klimova

Natalya Klimovaning go‘zalligi uni Qor malikasidan avvalroq yulduzga aylantirgandi: aktrisa allaqachon “Qorqiz” va “Ural ertaklari” filmlaridagi rollari bilan tanilgan. Uning kayrerasi juda yaxshi rivojlandi. Ammo bir muncha vaqt o‘tgach, Natalyaga sil kasalligi tashxisi qo‘yildi. U turmush tarzini tubdan o‘zgartirdi. Turmush o‘rtog‘i, aktyor Vladimir Zamanskiy bilan birga poytaxtdan Murom shahriga ko‘chib o‘tdi. Juftlik kamtarona uyda yashaydi, cherkovga boradi va shovqin-surondan uzoqda o‘zini juda baxtli his qiladi.

Gerda — Yelena Proklova

O‘n uch yoshli Lena Proklovaga “Qor malikasi”dagi ishtirok haqiqiy ertakka aylangan. Bugun u shahar bo‘ylab haqiqiy aravada suratga olish joyiga qanday olib borilganini, o‘sha paytda o‘zini qanday baxtli his qilganini katta iliqlik bilan eslaydi. Gerda uchun bir nechta liboslar tikilgan va ular qizga sovg‘a qilingan. Proklovaning karyerasi, ehtimol, boshqalarga qaraganda muvaffaqiyatli rivojlandi: uning hisobida o‘nlab mashhur filmlar bor, realiti-shouda ishtirok etdi. Ertak filmi chiqqanidan 40 yil o‘tgach, unga yana “Qor malikasi” filmida o‘ynash taklif qilindi, faqat Gerda emas, bosh qahramon — Qor malikasini. Aleksandr Abdulov eski ertak asosida zamonaviy film suratga olmoqchi edi. Afsuski, u rejalarini amalga oshirishga ulgurmay olamdan o‘tdi.

Kay (Key) — Vyacheslav Syupa

Kay rolini o‘ynagan 10 yoshli Vyacheslav Syupa bir zumda mashhur jajji aktyoriga aylandi: minglab qizlar uni sevib qoldi, onasi o‘g‘liga yo‘llangan xatlarni yashirincha yig‘di. Ammo u bolasini bunday mashhurlikka dosh bera olmasligidan va “yulduzlik kasali”ga chalinishdan qo‘rqardi. U bu maktublarni o‘g‘li 40 yoshga to‘lganida berdi. Filmning katta muvaffaqiyatiga qaramay, Vyacheslav aktyorlik faoliyatini davom ettirmadi. U yana bir qancha filmlarda suratga tushgan. Keyin esa rejissorlik kasbini egallab, butun umr teatrda ishladi. Krasnoyarsk opera va balet teatrida Syupa 40 dan ortiq spektakllarni sahnalashtirdi.

Kichkina qaroqchi — Era Ziganshina

Atamanshaning qizini 21 yoshli Era Ziganshina ijro etgan. Bu uning debyut roli edi. Aktrisaning so‘zlariga ko‘ra, unga ekrandagi ko‘rinishi haqiqatan ham yoqmagan. Ziganshina kinoni unchalik yoqtirmadi — u teatr sahnasida yashashni xohladi. Ammo 2000-yillarning boshida aktrisa yana ekranga qaytdi va ko‘plab film hamda seriallarda rol o‘ynadi. Biroq teatr uning hayotida alohida ahamiyatga ega: u Moskvada yashasa-da, vaqti-vaqti bilan Sankt-Peterburg Aleksandrinskiy teatrining spektakllarida qatnashadi.

Malika — Irina Gubanova

Irina Gubanova “Qor malikasi”dan keyin ham muvaffaqiyatli harakat qilishni davom ettirdi: tomoshabinlar uni “Samoviy qaldirg‘ochlar” musiqiy filmidagi roli orqali eslaydi. 90-yillarda u xorijiy filmlarni faol ravishda ishtirok etdi. Afsuski, aktrisa atigi 60 yil yashadi: u 2000-yilda og‘ir pnevmoniyadan keyin vafot etdi.

Ertakchi — Valeriy Nikitenko

“Qor malikasi” filmidan keyin Valeriy Nikitenko boshqa filmlarda ham suratga tushdi. U dublyaj sohasida ham o‘zini sinab ko‘rdi. Sankt-Peterburgdagi Komediya teatri ertakchining ikkinchi uyiga aylandi. Valeriy Nikitenko butun umri davomida u yerda ishladi. Uning ovozi radioda tez-tez yangraydi, aktyor hozirda 81 yoshda.

Buvisi — Yevgeniya Melnikova

Yevgeniya Melnikova Lyubov Orlova bilan birga “Sirk” filmida ishtirok etdi, “Xarakterli qizlar” ssenariysi u uchun maxsus yozilgandi, ammo u homiladorligini bilgach rol o‘ynashdan qat’iyan bosh tortdi: bola uchun muhimroq edi. Uning o‘rniga esa Valentina Serova filmda ishtirok etdi va yulduzga aylandi. Aktrisaning ijodida o‘nlab filmlar bor, lekin u ko‘proq onalar va buvilar rolini o‘ynar edi. Yevgeniya Konstantinovna uzoq umr ko‘rdi, u 2001-yilda 93 yoshida vafot etdi.

Siyohdon — Vera Titova

Siyohdon rolini ijro etgan Vera Titova boshqa rollari bilan tomoshabinlarga yaxshi tanish. Aktrisa “Qorqiz”da Zaryananing onasi, “Ochiq kitob”da Agasha va “Masha va Vityaning yangi yil sarguzashtlari” filmida Pechkaning rolini  o‘ynagan. Vera Titova 2006-yilda 77 yoshida vafot etdi.