Касаллик, театр, бевақт ўлим: «Қор маликаси» эртак-фильми актёрларининг тақдири қандай кечди? (фото)

«Қор маликаси» — кўпчиликнинг болаликдан севиб томоша қилган қишки эртак-фильми. Унда рол ўйнаганларнинг барчаси премьерадан сўнг машҳурликка эришди. Бироқ уларнинг ҳаммаси ҳам актёрлик фаолиятини давом эттирмади. «Новий очаг» нашри кимларнинг ҳаёти бутунлай бошқача йўналишда кетганини маълум қилди.

Қор маликаси — Наталя Климова

Наталя Климованинг гўзаллиги уни Қор маликасидан аввалроқ юлдузга айлантирганди: актриса аллақачон «Қорқиз» ва «Урал эртаклари» фильмларидаги роллари билан танилган. Унинг кайрераси жуда яхши ривожланди. Аммо бир мунча вақт ўтгач, Наталяга сил касаллиги ташхиси қўйилди. У турмуш тарзини тубдан ўзгартирди. Турмуш ўртоғи, актёр Владимир Заманский билан бирга пойтахтдан Муром шаҳрига кўчиб ўтди. Жуфтлик камтарона уйда яшайди, черковга боради ва шовқин-сурондан узоқда ўзини жуда бахтли ҳис қилади.

Герда — Елена Проклова

Ўн уч ёшли Лена Прокловага «Қор маликаси»даги иштирок ҳақиқий эртакка айланган. Бугун у шаҳар бўйлаб ҳақиқий аравада суратга олиш жойига қандай олиб борилганини, ўша пайтда ўзини қандай бахтли ҳис қилганини катта илиқлик билан эслайди. Герда учун бир нечта либослар тикилган ва улар қизга совға қилинган. Проклованинг карьераси, эҳтимол, бошқаларга қараганда муваффақиятли ривожланди: унинг ҳисобида ўнлаб машҳур фильмлар бор, реалити-шоуда иштирок этди. Эртак фильми чиққанидан 40 йил ўтгач, унга яна «Қор маликаси» фильмида ўйнаш таклиф қилинди, фақат Герда эмас, бош қаҳрамон — Қор маликасини. Александр Абдулов эски эртак асосида замонавий фильм суратга олмоқчи эди. Афсуски, у режаларини амалга оширишга улгурмай оламдан ўтди.

Кай (Кей) — Вячеслав Сюпа

Кай ролини ўйнаган 10 ёшли Вячеслав Сюпа бир зумда машҳур жажжи актёрига айланди: минглаб қизлар уни севиб қолди, онаси ўғлига йўлланган хатларни яширинча йиғди. Аммо у боласини бундай машҳурликка дош бера олмаслигидан ва «юлдузлик касали»га чалинишдан қўрқарди. У бу мактубларни ўғли 40 ёшга тўлганида берди. Фильмнинг катта муваффақиятига қарамай, Вячеслав актёрлик фаолиятини давом эттирмади. У яна бир қанча фильмларда суратга тушган. Кейин эса режиссёрлик касбини эгаллаб, бутун умр театрда ишлади. Красноярск опера ва балет театрида Сюпа 40 дан ортиқ спектаклларни саҳналаштирди.

Кичкина қароқчи — Эра Зиганшина

Атаманшанинг қизини 21 ёшли Эра Зиганшина ижро этган. Бу унинг дебют роли эди. Актрисанинг сўзларига кўра, унга экрандаги кўриниши ҳақиқатан ҳам ёқмаган. Зиганшина кинони унчалик ёқтирмади — у театр саҳнасида яшашни хоҳлади. Аммо 2000 йилларнинг бошида актриса яна экранга қайтди ва кўплаб фильм ҳамда сериалларда рол ўйнади. Бироқ театр унинг ҳаётида алоҳида аҳамиятга эга: у Москвада яшаса-да, вақти-вақти билан Санкт-Петербург Александринский театрининг спектаклларида қатнашади.

Малика — Ирина Губанова

Ирина Губанова «Қор маликаси»дан кейин ҳам муваффақиятли ҳаракат қилишни давом эттирди: томошабинлар уни «Самовий қалдирғочлар» мусиқий фильмидаги роли орқали эслайди. 90 йилларда у хорижий фильмларни фаол равишда иштирок этди. Афсуски, актриса атиги 60 йил яшади: у 2000 йилда оғир пневмониядан кейин вафот этди.

Эртакчи — Валерий Никитенко

«Қор маликаси» фильмидан кейин Валерий Никитенко бошқа фильмларда ҳам суратга тушди. У дубляж соҳасида ҳам ўзини синаб кўрди. Санкт-Петербургдаги Комедия театри эртакчининг иккинчи уйига айланди. Валерий Никитенко бутун умри давомида у ерда ишлади. Унинг овози радиода тез-тез янграйди, актёр ҳозирда 81 ёшда.

Бувиси — Евгения Мелникова

Евгения Мелникова Любов Орлова билан бирга «Цирк» фильмида иштирок этди, «Характерли қизлар» сценарийси у учун махсус ёзилганди, аммо у ҳомиладорлигини билгач рол ўйнашдан қатъиян бош тортди: бола учун муҳимроқ эди. Унинг ўрнига эса Валентина Серова фильмда иштирок этди ва юлдузга айланди. Актрисанинг ижодида ўнлаб фильмлар бор, лекин у кўпроқ оналар ва бувилар ролини ўйнар эди. Евгения Константиновна узоқ умр кўрди, у 2001 йилда 93 ёшида вафот этди.

Сиёҳдон — Вера Титова

Сиёҳдон ролини ижро этган Вера Титова бошқа роллари билан томошабинларга яхши таниш. Актриса «Қорқиз»да Зарянанинг онаси, «Очиқ китоб»да Агаша ва «Маша ва Витянинг янги йил саргузаштлари» фильмида Печканинг ролини  ўйнаган. Вера Титова 2006 йилда 77 ёшида вафот этди.