Исроил миллий хавфсизлик вазири Итамар Бен-Гвир Шарқий Қуддусдаги Ал-Ақсо масжидига борди, бу АҚШ, Фаластин ва бир қанча араб давлатлари, жумладан, Исроил билан тинчлик шартномасини имзолаган давлатлар томонидан қораланди. Бу ҳақда Al Jazeera хабар берди.
«Қуддусдаги муқаддас жойнинг статус-квосини хавф остига қўядиган ҳар қандай бир томонлама ҳаракатни қабул қилиб бўлмайди. АҚШ Қуддусдаги муқаддас жойларга нисбатан статус-квони сақлаб қолиш тарафдори», — деди Оқ уй матбуот котиби ва Исроил бош вазири Бенямин Нетаньяхуни муқаддас жойларнинг статус-квосига содиқлигини сақлаб қолишга чақирди.
Нетаньяху ҳолат юзасидан баёнот бериб, у «Маъбад тоғидаги (Ал-Ақсо мажмуасидаги) статус-квони ўзгартиришларсиз қатъий сақлашга содиқлигини» даъво қилди.
«Сўнгги йилларда статус-кво остида вазирлар Маъбад тоғига чиқди, шунинг учун статус-квога ўзгартириш киритилгани ҳақидаги даъво асоссиз», — деди у.
Қамалдаги Ғазо секторини бошқараётган Фаластин фракцияси бундай ҳаракат «қизил чизиқ»ни кесиб ўтиши ҳақида огоҳлантирганидан сўнг, Бен-Гвир Исроил ҳукумати «ҲАМАС таҳдидларига кўнмаслигини» айтди.
У узоқ вақтдан бери яҳудийларнинг муқаддас жойга киришини кенгайтиришга чақирган. Фаластинликлар буни Исроил мажмуани тўлиқ назорат қилмоқчилиги билан изоҳлайди.
Бен-Гвир Ал-Ақсога ташрифидан сўнг Twitter’да «мажмуа ҳамма учун очиқ, агар ҲАМАС менга таҳдид қилса, мени қўрқитаман деб ўйласа, замон ўзгарганини тушуниши керак» деб ёзди.
Фаластин Ташқи ишлар вазирлиги «экстремист вазир Бен-Гвир томонидан Ал-Ақсо масжидига бостириб киришни кескин қоралади ва буни мисли кўрилмаган провокация, можаронинг хавфли авж олиши деб баҳолади».
Исроил билан тинчлик шартномасига эга бўлган Иордания, Миср ва Бирлашган Араб Амирликлари Бен-Гвирнинг Ал-Ақсонга «босқин» қилганини қоралади.
Нетаньяху тинчлик битими тузмоқчи бўлган Саудия Арабистони ҳам Бен-Гвирнинг ҳаракатини танқид қилди. Яқинда Исроил билан узоқ давом этган дипломатик келишмовчиликка барҳам берган Туркия бу ташрифни ҳам «провокация» деб атади.
Исроил мухолифати етакчиси ва собиқ бош вазир Яир Лапид Ал-Ақсога Бен-Гвирнинг кириши зўравонликка олиб келишидан огоҳлантирган ва буни «ҳаётни хавф остига қўядиган қасддан провокация» деб атаган.
Изоҳ (0)