2-yanvarga o‘tar kechasi Ukraina Eronda ishlab chiqarilgan uchuvchisiz uchoqlarning ommaviy hujumiga uchradi. Ukraina Harbiy-havo kuchlari ma’lumotlariga ko‘ra, havo hujumidan mudofaa tizimlari 39 ta “Shahed-131/136” kamikadze-dronlari, shuningdek, ikkita “Orlan-10” uchuvchisiz uchoqlari va X-59 boshqariladigan aviaraketani urib tushirgan.
Kiyevda o‘qqa tutishlar oqibatida energetika infratuzilmasi obyektlari shikastlangan. “Shaharda elektr ta’minotida favqulodda uzilishlar mavjud. Ammo poytaxtda suv ta’minoti normal rejimda olib borilmoqda”, — deb yozdi shahar meri Vitaliy Klichko o‘zining Telegram-kanalida. Uning so‘zlariga ko‘ra, hujumlarda bir kishi jarohatlangan.
Kiyev meri poytaxtga qarata otilgan 40 ta drondan 15 tasi qo‘shni viloyatlar, uchtasi Kiyev viloyati va yana 22 tasi bevosita shahar ustida yo‘q qilinganini aytdi.
2-yanvarga o‘tar kechasi Ukraina viloyatlarining yarmida havo trevogasi yangradi.
Yangi yil kechasi Ukraina osmonida jami 45 ta Shahed-131 va Shahed-136 dronlari urib tushirilgan edi.
Oktabr oyi boshidan beri Rossiya Ukrainaning harbiy va energetika infratuzilmasiga muntazam raketa zarbalari berib kelmoqda. Hujumlarda Rossiya Erondan sotib olgan dronlar ham ishlatilmoqda.
Noyabr oyida Ukraina bosh vaziri Denis Shmigal Rossiyaning raketa zarbalari oqibatida Ukraina energetika tizimiga yetkazilgan jami zarar 70 milliard grivnadan (taxminan 1,9 milliard dollar) oshganini aytgan edi.
Izoh (0)