Украина ҳарбий-ҳаво кучлари: 2 январга ўтар кечаси 39 та камикадзе дрон уриб туширилди

2 январга ўтар кечаси Украина Эронда ишлаб чиқарилган учувчисиз учоқларнинг оммавий ҳужумига учради. Украина Ҳарбий-ҳаво кучлари маълумотларига кўра, ҳаво ҳужумидан мудофаа тизимлари 39 та «Shahed-131/136» камикадзе-дронлари, шунингдек, иккита «Орлан-10» учувчисиз учоқлари ва Х-59 бошқариладиган авиаракетани уриб туширган.

Киевда ўққа тутишлар оқибатида энергетика инфратузилмаси объектлари шикастланган. «Шаҳарда электр таъминотида фавқулодда узилишлар мавжуд. Аммо пойтахтда сув таъминоти нормал режимда олиб борилмоқда», — деб ёзди шаҳар мери Виталий Кличко ўзининг Telegram-каналида. Унинг сўзларига кўра, ҳужумларда бир киши жароҳатланган.

Киев мери пойтахтга қарата отилган 40 та дрондан 15 таси қўшни вилоятлар, учтаси Киев вилояти ва яна 22 таси бевосита шаҳар устида йўқ қилинганини айтди.

2 январга ўтар кечаси Украина вилоятларининг ярмида ҳаво тревогаси янгради.

Янги йил кечаси Украина осмонида жами 45 та Shahed-131 ва Shahed-136 дронлари уриб туширилган эди.

Октябрь ойи бошидан бери Россия Украинанинг ҳарбий ва энергетика инфратузилмасига мунтазам ракета зарбалари бериб келмоқда. Ҳужумларда Россия Эрондан сотиб олган дронлар ҳам ишлатилмоқда.

Ноябрь ойида Украина бош вазири Денис Шмигал Россиянинг ракета зарбалари оқибатида Украина энергетика тизимига етказилган жами зарар 70 миллиард гривнадан (тахминан 1,9 миллиард доллар) ошганини айтган эди.