Қурилиш вазирлиги томонидан 2022 йилда қандай ишлар амалга оширилди?

Янги Ўзбекистоннинг 2022—2026 йилларга мўлжалланган Тараққиёт стратегиясини «Инсон қадрини улуғлаш ва фаол маҳалла йили»да амалга оширишга оид давлат дастури ижроси юзасидан белгиланган вазифалар ҳам бажарилиб, барча амалга оширилган ишлар тарғиботи ОАВ орқали доимий тарзда журналист ва блогерлар билан ҳамкорликда амалга оширилди.

Ўзбекистон Республикаси президентининг 2022 йил 28 январдаги 60-сон фармони билан тасдиқланган Янги Ўзбекистоннинг тараққиёт стратегиясини амалга оширишга оид давлат дастурида Қурилиш вазирлигига жами 21 та вазифа юклатилган.

Ҳисобот даврида Қурилиш вазирлиги томонидан соҳани ривожлантириш ва ислоҳотларни чуқурлаштириш бўйича қуйидаги тизимли чора-тадбирлар амалга оширилди.

Ўзбекистон Республикаси президентининг 2022 йил 23 сентябрдаги «Республикада капитал қурилиш соҳасида буюртмачи хизмати фаолиятини такомиллаштириш чора-тадбирлари тўғрисида» ПҚ-378-сон қарори қабул қилинди.

Мазкур қарор билан қуйидагилар белгиланди:

2023 йил 1 январдан бошлаб Мактабгача таълим, Халқ таълими, Олий ва ўрта махсус таълим, Соғлиқни сақлаш, Маданият ҳамда спортни ривожлантириш вазирликлари ҳузуридаги буюртмачи хизматлари ва уларнинг ҳудудий филиаллари ҳамда Уй-жой коммунал хизмат кўрсатиш вазирлиги ҳузуридаги буюртмачи хизматининг ҳудудий филиаллари тугатилди, шунингдек, уларнинг функция ва ваколатлари маҳаллий ҳокимликлар ҳузуридаги «Ягона буюртмачи хизмати» инжиниринг компанияларига юклатилди:

• буюртмачи хизматларининг фаолияти Иқтисодий тараққиёт ва камбағалликни қисқартириш вазирлиги томонидан мувофиқлаштирилиши белгиланди;
• лойиҳа ҳужжатлари ва қурилиш ишлари сифатини ошириш ҳамда замонавий лойиҳа бошқаруви тизимини яратиш мақсадида инжиниринг компанияларининг штат жадвалига лойиҳа бошқаруви бўйича мутахассис, лойиҳа архитектори, лойиҳа муҳандиси лавозимлари киритилади;
• ҳар бир ҳудудда 10 миллиард сўмдан юқори бўлган, қурилиш ва (ёки) реконструкция қилиш ишлари 2023 йил 1 январдан бошланадиган камида 10 та объектда лойиҳа ҳужжатларини ишлаб чиқишда консалтинг хизматлари, лойиҳа бошқаруви хизматлари ҳамда техник назорат хизматларини кўрсатиш давлат харидлари тўғрисидаги қонунчиликка муофиқ, танлаб олинадиган тадбиркорлик субъектлари, шу жумладан хорижий ташкилотлар томонидан амалга оширилиши тартиби жорий қилинади.
• 2023 йил 1 апрелга қадар «Шаффоф қурилиш» миллий ахборот тизимида техник назорат ишларини амалга оширувчи тадбиркорлик субъектларини баҳолаш платформасини жорий қилинади. Бунда, рейтинг платформаси учун лойиҳалардаги мақбуллаштириш, қурилиш муддатини қисқартириш, сифатини ошириш, хавфсизлигини таъминлаш мезонлари асос қилиб олинади;
• 2023 йил 1 январдан бошлаб буюртмачи хизматлари техник топшириқлар ҳамда унга қўйиладиган функционал ва эксплуатация талабларини идоравий қурилиш нормаларига асосан ишлаб чиқади ва эксплуатация қилувчи ташкилотлар билан келишади;
• буюртмачи хизматларига техник топшириқ, эскиз лойиҳаси, унга қўйиладиган функционал ва эксплуатация талабларини ишлаб чиқишни аутсорсинг шартномалари асосида тадбиркорлик субъектларини жалб қилган ҳолда амалга ошириш ваколати берилади;
• 2023 йил 1 январдан бошлаб оммавий аҳамиятга эга ноёб ва алоҳида муҳим объектларнинг эскиз лойиҳасини ишлаб чиқиш учун буюртмачи хизмати томонидан архитектура танловини ўтказиш бўйича мажбурий тартиб белгиланади.
• 2023 йил 1 мартдан бошлаб марказлашган манбалар ҳисобидан молиялаштириладиган объектларнинг смета қийматини аниқлаш Давлат статистика қўмитаси, Давлат солиқ қўмитаси ҳамда бошқа вазирлик ва идораларнинг маълумотлар базаларини интеграция қилган ҳолда, Қурилиш вазирлиги томонидан жорий этиладиган «Қурилиш ресурслари миллий классификатори» электрон платформаси асосида амалга оширилади;
• бино ва иншоотларга қўйиладиган минимал функционал ва эксплуатация талабларини, шу жумладан, замонавий ресурс тежовчи технологияларни жорий этиш ва ушбу объектлардан фойдаланиш харажатларини оптималлаштиришга доир талабларни, идоравий қурилиш нормаларини Қурилиш вазирлиги билан келишган ҳолда тасдиқлаб борилади.