Avstraliyada ikki vertolyotning to‘qnashuvi oqibatida 4 kishi halok bo‘ldi (video)

Avstraliyada ikkita sayyohlik vertolyotining to‘qnashuvi oqibatida to‘rt kishi halok bo‘ldi, deb xabar bermoqda Kvinslend shtati politsiyasi.

To‘qnashuv mahalliy vaqt bilan 14:00 atrofida Brisbendan janubda Oltin sohildagi mashhur Meyn-Bich sayyohlik zonasi yaqinida sodir bo‘lgan. Vertolyotlar biri qo‘nayotgan, ikkinchisi esa havoga ko‘tarilayotgan paytda to‘qnashib ketgan.

“Vertolyotlar Sea World kurorti tashqarisidagi qumli qirg‘oqqa qulab tushdi, bu esa qutqaruvchilarning ularga yetib borishini qiyinlashtirdi”, — dedi Kvinslend politsiya xizmati vakili Gari Uorrell ABC telekanaliga.

CNN Kvinslend tez tibbiy yordam xizmati vakiliga tayanib xabar berishicha, ikkita vertolyotda jami 13 kishi bo‘lgan, ulardan to‘rt nafari halok bo‘lgan, to‘qqiz nafari yaralangan — uch kishining ahvoli og‘ir. Uorrelning aniqlik kiritishicha, barcha qurbonlar yoki og‘ir yaralanganlar bitta vertolyotda bo‘lgan.

Kvinslend bosh vakili Anastasiya Palashuk halok bo‘lgan va jarohatlanlarning oila a’zolariga chuqur hamdardlik bildirdi. “Bugun Oltin sohilda sodir bo‘lgan voqea aql bovar qilmaydigan fojia”, — deb yozdi u Twitter sahifasida.

Avstraliya transport xavfsizligi byurosi (ATSB) voqea yuzasidan tekshiruv boshladi. Mutaxassislar vertolyotlar vayronalarini ko‘zdan kechirmoqda, zarur namunalar olib, guvohlar bilan suhbatlashmoqda.