Австралияда иккита сайёҳлик вертолётининг тўқнашуви оқибатида тўрт киши ҳалок бўлди, деб хабар бермоқда Квинсленд штати полицияси.
Тўқнашув маҳаллий вақт билан 14:00 атрофида Брисбендан жанубда Олтин соҳилдаги машҳур Мейн-Бич сайёҳлик зонаси яқинида содир бўлган. Вертолётлар бири қўнаётган, иккинчиси эса ҳавога кўтарилаётган пайтда тўқнашиб кетган.
«Вертолётлар Sea World курорти ташқарисидаги қумли қирғоққа қулаб тушди, бу эса қутқарувчиларнинг уларга етиб боришини қийинлаштирди», — деди Квинсленд полиция хизмати вакили Гари Уоррелл ABC телеканалига.
CNN Квинсленд тез тиббий ёрдам хизмати вакилига таяниб хабар беришича, иккита вертолётда жами 13 киши бўлган, улардан тўрт нафари ҳалок бўлган, тўққиз нафари яраланган — уч кишининг аҳволи оғир. Уоррелнинг аниқлик киритишича, барча қурбонлар ёки оғир яраланганлар битта вертолётда бўлган.
Квинсленд бош вакили Анастасия Палашук ҳалок бўлган ва жароҳатланларнинг оила аъзоларига чуқур ҳамдардлик билдирди. «Бугун Олтин соҳилда содир бўлган воқеа ақл бовар қилмайдиган фожиа», — деб ёзди у Twitter саҳифасида.
Австралия транспорт хавфсизлиги бюроси (АЦБ) воқеа юзасидан текширув бошлади. Мутахассислар вертолётлар вайроналарини кўздан кечирмоқда, зарур намуналар олиб, гувоҳлар билан суҳбатлашмоқда.
Изоҳ (0)