AQSH prezidenti Jo Bayden ushbu lavozimga qayta saylanish uchun nomzodini qo‘yish-qo‘ymasligi haqida hali bir qarorga kelmagan, deb yozadi Politico xabardor manbalar bilan shaxsiy suhbatlarga tayanib.
Avval OAV Bayden bu haqda Santa-Krus orolida o‘tkazadigan ta’tili chog‘ida oilasi, bir nechta yaqin do‘stlari va ittifoqchilari bilan maslahatlashgan holda qaror qilishi mumkinligini xabar qilgandi.
Davlat rahbariga yaqin manbalarning aytishicha, uning saylovlarda yana ishtirok etishi ehtimoli “yuqori va yanada ortib bormoqda”. Manbalarga ko‘ra, Bayden yakuniy qarorini fevral o‘rtalarida e’lon qiladi.
Baydenning ba’zi yaqinlari 80 yoshli prezident uchun kampaniya oqibatlaridan xavotirda bo‘lsa-da, prezidentning rafiqasi Jill Bayden nomzodlik qarorini qo‘llab-quvvatlamoqda, deb ta’kidladi nashr manbalari.
Aprel oyida The Hill nashri Bayden 2024-yilgi saylovlarda ishtirok etish niyati borligini “hammaga tushuntirayotgani” haqida xabar bergandi. Nashr manbasiga ko‘ra, u bu haqda sobiq prezident Barak Obama bilan muhokama qilgan. Keyinchalik Oq uy bunday rejalarni tasdiqladi. Iyun oyida The New York Times ba’zi demokratlar Baydenning reytingi sabab uning g‘alaba qozonishiga ishonchi komil emasligini yozgandi. Shu bilan birga, ko‘plab Demokratik partiya tarafdorlari “boshqa istalgan demokrat Baydendan yaxshiroq ishlaydi” degan fikrlarni rad etgan.
Izoh (0)