O‘zbekistonda 2022-yilning eng yaxshi asarlari aniqlandi

O‘zbekiston Yozuvchilar uyushmasida mazkur ijodiy tashkilot tomonidan o‘tkazilgan “Yilning eng yaxshi asari” respublika tanlovi g‘oliblarini taqdirlash marosimi bo‘lib o‘tdi. Bu haqda O‘zA xabar berdi.

Tanlov badiiy adabiyotning beshta yo‘nalishida – nasr, she’riyat, dramaturgiya, badiiy tarjima, adabiy tanqid, badiiy publitsistika bo‘yicha bo‘lib o‘tgan. Tanlovda Yozuvchilar uyushmasi a’zolari, adiblar ishtirok etgan.

Ijodkorlar 2022-yilning 1-yanvaridan 10-dekabrigacha matbuotda, nashriyotlarda chop etilgan, adabiy jamoatchilik va keng kitobxonlar ommasi e’tirofiga sazovor bo‘lgan yangi asarlari, o‘zbek mumtoz va zamonaviy adabiyotimiz namunalarining xorijiy tillarga tarjima etilgan yangi tarjimalari hamda jahon adabiyoti durdonalaridan o‘zbek tiliga o‘girilgan yangi ijod namunalarini taqdim etgan.

Tanlov jarayonida she’riy asarlar – 17 nafar muallifdan jami 25 ta asar, nasriy asarlar – 16 nafar muallifdan jami 26 asar, tarjima bo‘yicha 9 nafar muallifdan 21 ta asar, dramatik asarlar bo‘yicha 6 nafar muallifdan 8 ta asar, adabiy tanqidiy va publitsistik asarlarning 14 muallifidan 23 ta asar ko‘rilgan.

• She’riyat bo‘yicha Raim Farhodiy – bolalarga bag‘ishlab yozilgan “Slon – avtobus” kitobi uchun;
• Tursun Ali – “Saylanma” she’riy kitobi uchun;
• Nasr bo‘yicha Muhammad Ali – “Kleopatra” tarixiy romani uchun;
• Shahodat Isaxonova – “Nodirai Davron” tarixiy romani uchun;
• Drama bo‘yicha Qo‘chqor Norqobil – “Tog‘lardek baland bo‘l” kitobi uchun;
• Tarjima bo‘yicha Risolat Haydarova – Ivan Buninning “Xilvat xiyobonlar”, Galina Dolgayaning “Yugurik suvlar qo‘shig‘i”, Nobel mukofoti sovrindori Ivo Andrichning “Drina ko‘prigi” romanlari tarjimasi uchun;
• Adabiy tanqid va publitsistika yo‘nalishida Marat Tao‘muratov “O‘zbekiston adabiyoti va san’ati”, “Amudaryo” kabi nashrlarda e’lon qilingan turkum maqola va esselari uchun g‘olib topilgan.

Tadbirda “Yilning eng yaxshi asari” ijodiy tanlovi g‘oliblari taqdirlangan.