Qashqadaryo viloyatining Dehqonobod tumanida Yangi yil bayrami arafasida salkam 3 milliard so‘mga qad rostlagan zamonaviy shifoxona va 21 ta bolalar bog‘chasi foydalanishga topshirildi. Bu haqda “Daryo”ga tuman hokimligi axborot xizmati xabar berdi.
Ma’lum bo‘lishicha, tumanning olis tog‘li hududi “Chashmaimiron” mahallasida 2 milliard 846 million so‘m mablag‘ evaziga tibbiyot birlashmasining “Boshchorbog‘” filiali binosi qurib bitkazilgan.
Hududda to‘rtta mahalla mavjud bo‘lib, jami 12 mingdan ortiq aholi istiqomat qiladi. Aholiga sifatli tibbiy xizmat ko‘rsatish maqsadida 3-sonli oilaviy poliklinika, tez tibbiy yordam shoxobchasi va tuman markaziy shifoxonasining 14 o‘ringa ega bo‘lgan filiali binosi ish boshladi. Bu yerda 3 nafar shifokor va 40 dan ortiq o‘rta tibbiyot xodimlari faoliyat yuritadi. Mazkur filial va tez tibbiy yordam shoxobchasi 1969-yilda qurilgan bo‘lib, juda achinarli ahvolda edi, — deydi tuman tibbiyot birlashmasi boshlig‘i Shavkat Amirov.
Tumanda 3—7 yoshli bolalar 14635 nafarni tashkil qiladi. 2017-yilda tumanda bor yo‘g‘i 7 ta davlat maktabgacha ta’lim tashkiloti mavjud bo‘lib, qamrov atigi 2,8 foiz bo‘lgan. 2022-yilga kelib bu ko‘rsatkich 52,1 foizga yetdi, — deydi tuman hokimi Zoir Aliqulov.
Qo‘shimcha qilinishicha, ayni kunda tumanda 14 ta davlat maktabgacha ta’lim tashkiloti, 10 ta davlat-xususiy sheriklik asosidagi nodavlat maktabgacha ta’lim tashkiloti va 136 ta oilaviy nodavlat maktabgacha ta’lim tashkiloti hamda 1 ta tashkilot tasarrufidagi maktabgacha ta’lim tashkiloti bor.
Ushbu muassasalarga 7624 nafar bola qamrab olingan. 2022-yil davomida qo‘shimcha 3 ta davlat, 16 ta 25 o‘rinli oilaviy nodavlat maktabgacha ta’lim muassasalari tashkil etildi. Shu bilan birga 8 ta har biri 30 o‘rinli bo‘lgan 6 yoshli bolalarni bepul majburiy tayyorlov guruhlari tashkil etilib 164 nafar bola ushbu guruhlarga qamrab olingan, — deydi Dehqonobod tuman maktabgacha ta’lim bo‘limi mudiri Xoliyor Mengliyev.
Izoh (0)