АОКАда ўтказилган брифингда Маданий мерос агентлиги ахборот хизмати раҳбари Моҳинур Имомова Самарқанд вилоятидаги маданий мерос объектларини реставрация, консервация қилиш ишлари ҳақида маълумот берди.
Қайд этилишича, мамлакатда ҳозирги кунга қадар 8 минг 210 та моддий маданий мероснинг кўчмас мулк объекти давлат муҳофазасига олинган бўлиб, шундан 4 минг 788 таси археология, 2 минг 265 таси архитектура объектлари, 625 таси монументал санъат асарлари, 530 таси диққатга сазовор жойлар ҳисобланади.
2022 йил давомида Самарқандда 14 та объектда реставрация ва консервация ишлари олиб борилган. Унга жами 28,7 миллиард сўм маблағ ажратилган. Самарқанд шаҳридаги «Самарқанд-маданиятлар чорраҳаси» объекти ҳудудида жойлашган Регистон ансамбли, Шоҳи Зинда ва Бибихоним мажмуалари, Амир Темур мақбараси, Улуғбек расадхонаси, Оқ Сарой, Хўжа Дониёр мақбараси, Руҳобод мажмуаси, Ашратхона мақбараси, Чорсу савдо гумбази ва Қўшҳовуз масжидларини таъмирлаш-тиклаш ишларини олиб борилган.
Жорий йилда республика миқёсида 64 та моддий маданий мерос объектида реставрация ва консервация ишлари олиб борилган.
Сўнгги уч йилда 250 дан ортиқ маданий мерос объектлари реставрация ва консервация қилинган. Мазкур объектларга давлат бюджетидан 339 миллиард сўм маблағ сарфланган. Бугунги кунда республикада 400 дан ортиқ уста-реставраторлар бор.
Изоҳ (0)