Қашқадарё вилоятининг Деҳқонобод туманида Янги йил байрами арафасида салкам 3 миллиард сўмга қад ростлаган замонавий шифохона ва 21 та болалар боғчаси фойдаланишга топширилди. Бу ҳақда «Дарё»га туман ҳокимлиги ахборот хизмати хабар берди.
Маълум бўлишича, туманнинг олис тоғли ҳудуди «Чашмаимирон» маҳалласида 2 миллиард 846 миллион сўм маблағ эвазига тиббиёт бирлашмасининг «Бошчорбоғ» филиали биноси қуриб битказилган.
Ҳудудда тўртта маҳалла мавжуд бўлиб, жами 12 мингдан ортиқ аҳоли истиқомат қилади. Аҳолига сифатли тиббий хизмат кўрсатиш мақсадида 3-сонли оилавий поликлиника, тез тиббий ёрдам шохобчаси ва туман марказий шифохонасининг 14 ўринга эга бўлган филиали биноси иш бошлади. Бу ерда 3 нафар шифокор ва 40 дан ортиқ ўрта тиббиёт ходимлари фаолият юритади. Мазкур филиал ва тез тиббий ёрдам шохобчаси 1969 йилда қурилган бўлиб, жуда ачинарли аҳволда эди, — дейди туман тиббиёт бирлашмаси бошлиғи Шавкат Амиров.
Туманда 3—7 ёшли болалар 14635 нафарни ташкил қилади. 2017 йилда туманда бор йўғи 7 та давлат мактабгача таълим ташкилоти мавжуд бўлиб, қамров атиги 2,8 фоиз бўлган. 2022 йилга келиб бу кўрсаткич 52,1 фоизга етди, — дейди туман ҳокими Зоир Алиқулов.
Қўшимча қилинишича, айни кунда туманда 14 та давлат мактабгача таълим ташкилоти, 10 та давлат-хусусий шериклик асосидаги нодавлат мактабгача таълим ташкилоти ва 136 та оилавий нодавлат мактабгача таълим ташкилоти ҳамда 1 та ташкилот тасарруфидаги мактабгача таълим ташкилоти бор.
Ушбу муассасаларга 7624 нафар бола қамраб олинган. 2022 йил давомида қўшимча 3 та давлат, 16 та 25 ўринли оилавий нодавлат мактабгача таълим муассасалари ташкил этилди. Шу билан бирга 8 та ҳар бири 30 ўринли бўлган 6 ёшли болаларни бепул мажбурий тайёрлов гуруҳлари ташкил этилиб 164 нафар бола ушбу гуруҳларга қамраб олинган, — дейди Деҳқонобод туман мактабгача таълим бўлими мудири Холиёр Менглиев.
Изоҳ (0)