“Men ham nevaralarimdan har yakshanba baholarini so‘rayman” — prezident

Ayni daqiqalarda Shavkat Mirziyoyev ta’lim sohasi mutasaddilari hamda o‘qituvchilar bilan muloqot qilmoqda.

Davlat rahbari maktab o‘quvchilari va majburiy mehnat haqida gapirdi.

“Bu qarorni (maktab o‘quvchilarini majburiy mehnatga jalb etishni taqiqlash) qabul qilish oson bo‘lgani yo‘q. Bolalarimiz 7-sinfdan chiqardi paxtaga. Tasavvur qiling, yosh-yosh qizlarimiz 20-25 kilo yukni har kuni ko‘tarishga majbur edi. Shu tufayli qancha kasalliklar orttirib olinardi, ba’zi holatlarda uni davolashga ham imkoniyat bo‘lmasdi. Vaholanki, ularning qanchadan-qancha orzulari bor edi, ular farzand ko‘rishi kerak edi. Endi u kunlarga qaytmaymiz”, — dedi Shavkat Mirziyoyev.

“Bugun darsliklar o‘zgaryapti. O‘qituvchilar ham o‘zgarishi kerak. O‘zgarishlaringizga majbur qilamiz. O‘zgarmasangiz xayrlashamiz. Shuning uchun ham bugun sizlar bilan ko‘rishib, gaplashyapmiz. Bugun kechagidek dars berishni qabul qilib bo‘lmaydi. Buni ota-onalar ham, o‘quvchilar ham qabul qilmaydi. Ota-onalarning ham mas’uliyatini oshirishimiz kerak.

Mening ham nevaralarim bor. Yakshanba kuni o‘zim ulardan baholarini so‘rayman. Har birining daftarini ko‘raman, ular ham o‘zaro bilimda raqobat qiladi. Bu narsa barcha oilada bo‘lishi kerak.

Har bir bolamiz kasb bilishi kerak, Ular o‘z bilimlari bilan kerak bo‘lsa Amerikadan buyurtma olib, ishlashi kerak”, — dedi Shavkat Mirziyoyev.