“Bitiruvchi sinf o‘quvchilariga erkin nafas olishlariga yo‘l qo‘yib berishimiz kerak” — prezident

Ayni daqiqalarda Shavkat Mirziyoyev ta’lim sohasi mutasaddilari hamda o‘qituvchilar bilan muloqot qilmoqda.

Muloqotda davlat rahbari oliy ta’lim muassasalariga kirish imtihonlari maktabda o‘tilgan fanlar bo‘yicha o‘tkazilishi bo‘yicha berilgan taklifni ma’qulladi.

“Bu nomutanosiblikka barham berish kerak. Maktabda o‘tilmagan fanlar bo‘yicha savollar berilmasligi kerak. Men bu bo‘yicha topshiriq berganman”, — dedi davlat rahbari

Davlat rahbari Andijon viloyatida qurilayotgan Yangi Andijon shaharchasi haqida gapirdi.

“500 ming kishi yashaydigan Yangi Andijon shaharchasini barpo etyapmiz. U yerda ta’lim sohasiga ham ko‘p e’tibor qaratamiz. Nasib qilsa, Andijon markazidan Yangi Andijonga qadar yer usti metrosini ham olib boramiz. Nafaqat Yangi Andijon, barcha hududlarimizda muallimlarga ham, o‘quvchilarga ham katta e’tiborni kuchaytiramiz”, — dedi prezident.

Shavkat Mirziyoyev, shuningdek, bitiruvchi sinflardagi o‘qituvchilar haqida ham gapirdi.

“Bu yosh butun kelajakni belgilab beradigan yosh hisoblanadi. Ularni har tomonlama hamjihat qilishimiz kerak. Biz ularni yomon deyishimizdan avval ularga qanday yaxshi sharoit yaratdik, degan savolga javob topish kerak. Ularga qancha ko‘p sharoit yaratib bersak, kelajagimiz uchun shuncha ko‘p yaxshi bo‘lishi aniq”, — dedi davlat rahbari.