Beva ayolga sihatgoh yo‘llanmasi, bemor operatsiyasiga 20 mln so‘m pul va otasi xorijda ishlayotgan bolaga bayram sovg‘asi: Mirzayevning migrantlar bilan suhbatida nimalar hal bo‘ldi?

Toshkent viloyati hokimi Zoir Mirzayev xorijda mehnat qilayotgan toshkentlik migrantlar bilan suhbatlashib, ularning muammosini o‘rgandi. Bu haqda “Daryo”ga viloyat hokimligi axborot xizmati xabar berdi.

Ma’lum qilinishicha, hokim va migrantlarning onlayn muloqoti salkam 4 soat davom etgan.

Onlayn suhbatda Rossiya, Turkiya, Misr, Fransiya singari mamlakatlarda istiqomat qilayotgan ta’lim va mehnat migrantlari ishtirok etdi. Muloqot davomida sog‘liqni saqlash, bandlik, moddiy-ko‘makka doir bir qancha murojaatlar tinglandi va yechimi haqida mas’ullarga topshiriq berildi.Xususan, Rossiyaning Moskva viloyatida ishlab kelayotgan Nodira Maqsudova turmush o‘rtog‘ining vafotidan so‘ng sog‘ligi yomonlashganini aytib, yashash joyiga yaqinda qaytmoqchiligini, sihatgohga yo‘llanma olishda ko‘mak zarurligini aytdi. Mazkur murojaat viloyat hokimi va o‘rinbosarlari ishtirokida muhokama qilinib, Nodira opaga amaliy yordam beriladigan bo‘ldi, — deydi viloyat hokimi matbuot kotibi Behzod Qobulov.

Viloyat rahbari murojaatchiga 20 million so‘m miqdorida moddiy yordam berilishidan tashqari, uning farzandlariga Yangi yil sovg‘alarini yuborish lozimligini aytib, mas’ullarga bu borada topshiriq berdi va natijani ko‘rishini bildirdi. Qolaversa, murojaatchi Shahboz Ikramovga oilasining daromadini yaxshilash uchun qishloq xo‘jaligida foydalaniladigan yer maydonidan 50 sotix ajratiladigan bo‘ldi, — deydi hokimlik axborot xizmati xodimi Asqar Ismoilov.

Qo‘shimcha qilinishicha, viloyat hokimi mutasaddilarga muloqot formatini saqlagan holda, qamrovni kengaytirish, ishtirokchilarni kengroq jalb etish, muntazam ravishda shunday suhbatlarni tashkil etib borish bo‘yicha ko‘rsatma berib, jarayonlarda bir vaqtning o‘zida YouTube, Telegram, Facebook orqali namoyish etilgan jonli efirlar izohlarida berilayotgan savollarga shaxsan javob qaytargan.